Ксёндз Завальнюк набраў тысячу падпісчыкаў. Ён стаў адзіным, хто згадаў пра гадавіну закрыцця Чырвонага касцёла

На YouTube-канал ксяндза Уладзіслава Завальнюка менш чым за два месяцы падпісаліся больш за тысячу чалавек, а многія яго відэа набіраюць звыш тысячы праглядаў. Улічваючы, што запісы маюць даволі вузкую накіраванасць і не ўтрымліваюць элементаў відовішчнасці, вынік можна ацаніць як высокі.

У апошнім відэа, прысвечаным гісторыі фігуры Арханёла Міхаіла перад Чырвоным касцёлам у Мінску, святар нагадаў пра другую гадавіну закрыцця храма. Ксёндз Уладзіслаў Завальнюк стаў адзіным з духавенства, хто публічна згадаў пра гэтую дату. У афіцыйных медыя і нават на сайце парафіі Святога Сымона і Святой Алены пра гэта прамаўчалі.

Каментуючы дату, святар заклікаў вернікаў «не праклінаць, а маліцца»:

«Просім Божай ласкі, каб храм быў вернуты на хвалу Богу і людзям – на духоўнае дабро. Молімся, смуткуем і просім гарадскія ўлады аб хутчэйшым вяртанні святыні вернікам і на хвалу Богу. Не праклінайце, а маліцеся, а суд і кару Божую даверце Госпаду. Бог ім суддзя».

Запісы ксяндза Уладзіслава Завальнюка можна аднесці, хутчэй, да відэа-падкастаў. Добрыя паказчыкі яго канала пацвярджаюць тое, што фармат падкастаў працягвае набіраць папулярнасць – важна толькі знайсці сваю аўдыторыю.

Нагадаем, дзе шукаць «каталіцкія» падкасты, мы распавядалі тут >

Наш канал в Telegram – только интересное и важное. Подписаться >