Два гады як закрыты Чырвоны касцёл у Мінску: «пячаткі на месцы» ды іншыя факты

Мінула два гады з таго часу, як зачынілі Чырвоны касцёл у Мінску – храм парафіі Святога Сымона і Святой Алены, адну з самых вядомых каталіцкіх святыняў Беларусі. 25 верасня 2022 года тут апошні раз цэлебравалі святую Імшу. У наступную ноч у святыні адбыўся пажар пры дзіўных абставінах і 26 верасня дзверы касцёла апячаталі.

Katolik.life спытаў у парафіянаў, што адбываецца з касцёлам цяпер, і пералічвае ключавыя факты.

Прычынай закрыцця храма ўлады назвалі яго быццам бы аварыйны стан і паведамілі пра неабходнасць у рамонце, праводзіць які мае права толькі дзяржава.

Пасля году маўчання ўлады паведамілі, што працы ў храме павінны пачаць у першым квартале 2024 года, аднак гэтага не адбылося. Затым гэта патлумачылі неабходнасцю дапрацоўкі праекта.

На працягу ўсяго часу касцёльны камітэт звяртаўся і публікаваў адкрытыя лісты да вышэйшых чыноўнікаў – у тым ліку да Аляксандра Лукашэнкі, Наталлі Качанавай, Наталлі Пяткевіч, але гэта нічога не змяніла.

У ліпені 2024 года Мітрапаліт Мінска-Магілёўскі звольніў шматгадовага пробашча парафіі ксяндза Уладзіслава Завальнюка, які ўвесь гэты час малітоўна змагаўся за вяртанне храма. Каталіцкая супольнасць успрыняла гэта як адказ на пастаўленыя ўладамі ўмовы – змяніць пробашча.

Затым парафія канчаткова пакінула комплекс і вызваліла плябанію – дом для святароў побач з касцёлам, дзе, нягледзячы на адсутнасць электрычнасці, ацяплення і вады адпраўлялі святую Імшу і ладзілі набажэнствы ў інтэнцыі вяртання храма.

У жніўні Апостальскі нунцый у Беларусі сустрэўся з Аляксандрам Лукашэнкам і «закрануў пытанні, якія хвалююць каталіцкую супольнасць у Беларусі». Відавочна, што закрыты Чырвоны касцёл – адно з такіх пытанняў.

Аднак усе гэтыя дзеянні пакуль ніяк не змянілі сітуацыю, гавораць у парафіі:

«Ніякай інфармацыі пра зрухі да адкрыцця храма не чутна. Новы пробашч пакуль не абнадзеіў нічым, толькі выказаўся, што сам «спадзяецца на лепшае» і чакае. Касцёльны камітэт у былым складзе не дзейнічае, пра нейкую сустрэчу новага камітэта не чулі. Візуальна ў храме нічога не мяняецца. Нядаўна былі побач – не бачна, каб там збіраліся штосьці рамантаваць. Дзверы закрытыя, пячаткі на месцы».

На сайце парафіі перасталі з'яўляцца «вострыя» паведамленні па тэме вяртання храма – цяпер там публікуюцца толькі кароткія парафіяльныя абвесткі з пералікам літургічных святаў.

Наш канал в Telegram – только интересное и важное. Подписаться >