У «Гомельскіх Курапатах» адбылося набажэнства, а ў Мінску, падобна, – зноў не

Традыцыйнае набажэнства ля памятнага крыжа на 9-м кіламетры Чарнігаўскай шашы ў Гомелі правялі каталіцкія вернікі на чале з біскупам Казімірам Велікасельцам 2 лістапада. Штогод у дзень успаміну памерлых тут, на месцы масавых пахаванняў рэпрэсаваных, католікі збіраюцца на малітву.

На апублікаваных гомельскай парафіяй фота бачна, што надпіс на крыжы «Адно з месцаў масавых расстрэлаў ахвяр бальшавіцкай дыктатуры ў перыяд 1919-1940 г.» практычна не бачны. Надпіс выцвіў, як і фарба на самым крыжы, а прывесці месца памяці ў парадак у цяперашніх умовах ніхто не вырашаецца.

Падобна, што Гомель стаў адзіным месцам у Беларусі, дзе адбылося набажэнства ў памяць аб савецкіх рэпрэсаваных. Ужо трэці год запар не з'явілася традыцыйнага паведамлення аб малітве каталіцкіх іерархаў у Курапатах у Мінску 1-2 лістапада – на месцы самых масавых у Беларусі расстрэлаў і пахаванняў рэпрэсаваных.

Апошні раз аб гэтай раней штогадовай малітве паведамлялася ў 2022 годзе, калі ў Курапатах пабывалі Апостальскі нунцый арцыбіскуп Антэ Ёзіч і Мітрапаліт Мінска-Магілёўскі арцыбіскуп Юзаф Станеўскі.

Пасля гэтага дзяржаўная газета абрынулася на каталіцкіх іерархаў з абвінавачваннямі ў тым, што яны «ладзяць цырк на касцях», і ў цэлым у «дэструктыўнай дзейнасці» Каталіцкай царквы.

З таго часу паведамленняў аб малітве ў Курапатах не з'яўлялася, і невядома, ці праводзіцца яна наогул. Сёлета ўрочышча наведвалі еўрапейскія дыпламаты, але сярод іх не быў заўважаны цяперашні дыппрадстаўнік Ватыкана.

Раней арцыбіскуп Тадэвуш Кандрусевіч называў Курапаты «Галгофай беларускага народа» і адзначаў, што гэтае месца – неад'емная частка гісторыі народа, без пазнання і ацэнкі якой ён не мае будучыні.

Наш канал в Telegram – только интересное и важное. Подписаться >