«Духоўны цэнтр» замярзае. У Будславе няма ацяплення – і гэта не праблема?

У Нацыянальным санктуарыі ў Будславе 7 лютага прайшоў Агульнабеларускі дзень кансэкраванага жыцця. Апублікаваныя парафіяй здымкі ўражваюць [глядзіце ніжэй]: многія манахіні, свецкія вернікі, якія сабраліся ў храме, вымушаны былі сядзець у шапках, капюшонах і пальчатках – тэмпература была амаль як на вуліцы.

Адзін са святароў нават адпраўляў Эўхарыстыю ў пальчатках і так трымаў Цела Хрыста. Тое, што ў будслаўскім касцёле холадна, было вядома і раней, але гэтыя здымкі найбольш яскрава паказваюць сітуацыю.

У Нацыянальным санктуарыі ўвогуле няма і не было ацяплення, і гэтай сцюдзёнай зімой праблема стала найбольш востра. У невялікай парафіі няма сродкаў на цеплавыя пушкі, лямпы і падобнае абсталяванне, як у іншых «старых» касцёлах – напрыклад, у Варнянах.

Але ж нядаўна будслаўскі касцёл афіцыйна назвалі «духоўным цэнтрам католікаў Беларусі». Ці адпавядае яго стан такому высокаму статусу? Адтуль робіць прыгожую карцінку ТБ, пра яго распавядаюць іерархі, туды прывозяць экскурсіі, аднак праблемы застаюцца не заўважанымі. Прычым, такія банальныя – не кажучы ўжо пра неабходнасць замены часовага даху на пастаянны ды іншыя больш істотныя пытанні. 

Нагадаем, касцёл у Будславе патрабуе далейшай рэстаўрацыі. У апошнюю Дзяржаўную інвестыцыйную праграму ён не быў уключаны.