Ксёндз Завальнюк папрасіў памерлага біскупа Велікасельца аб заступніцтве ў незвычайнай справе

Экс-пробашч парафіі Чырвонага касцёла ў Мінску ксёндз Уладзіслаў Завальнюк выпусціў відэа да 30 дзён смерці біскупа Казіміра Велікасельца і пракаментаваў:

«У такім узросце, у матэрыяльнай беднасці будаваў касцёл у Гомелі, што і падарвала яго здароўе. Яго шмат разоў падманвалі фірмы, прадпрымальнікі, не трымалі слова – кідалі. Адны нервы. Сэрца не вытрымала, памёр на пасту».

У другой частцы свайго відэа святар скіраваў да памерлага біскупа адкрыты зварот-малітву. Ён узгадаў, што менавіта Казімір Велікаселец «не пабаяўся і благаславіў» пілігрымку копій Марыйных абразоў вакол Беларусі з просьбай аб абароне ад каронавірусу, пажару і вайны.

У сувязі з гэтым ксёндз звярнуўся да біскупа, які адышоў да Неба, з просьбай:

«Спадзяемся і верым, што дзякуючы тваёй смеласці, заступніцтву перад Багародзіцай, іерархі лакальнага Касцёла ў Беларусі дадуць-такі згоду на прысваенне копіям Марыйных абразоў статусу адпустовых».

Ксёндз Завальнюк патлумачыў, чаму гэта важна: каб людзі, якія сустракаюць пілігрымку абразоў, моляцца перад імі, змаглі атрымаць адпуст:

«Асабліва старэйшага ўзросту і хворыя, людзі, якія ніколі не змогуць быць у тых санктуарыях».

Паводле святара, на гэта рашэнне чакае Дыкастэрыя па справах культу ў Ватыкане. Ён нагадаў, што сёлета пілігрымцы Марыйных абразоў, якая працягвае падарожжа па парафіях Беларусі, спаўняецца пяць гадоў.

Наш канал в Telegram – только интересное и важное. Подписаться >