Як у новым касцёле Гродна стваралі галоўную ікону з тысяч каменьчыкаў, паказаў майстар

У гродзенскім мікрараёне Альшанка 24 траўня пройдзе асвячэнне новазбудаванага касцёла Святога Духа. Цяпер там завяршаюцца аздабленчыя работы і нядаўна ў храме з'явілася алтарная ікона – Святога Духа ў выглядзе голуба [глядзіце фота ніжэй]

Яна выканана ў тэхніцы мазаікі і створана з тысяч маленькіх каменчыкаў. Працэс паказалі самі майстры – як вынікае з іх старонкі, яны праваслаўныя вернікі і раней стваралі абразы з мазаікі для праваслаўных храмаў.

«Даўно было жаданне папрацаваць з натуральным каменем і вось такая магчымасць з'явілася», – напісаў мастак.

Гэта парафія была заснавана ў 2012 годзе, а благаслаўленне зямлі і крыжа на месцы будаўніцтва касцёла здзейсніў біскуп Гродзенскі Аляксандр Кашкевіч у 2015 годзе – будаўніцтва храма вялося каля 10 гадоў.

Праект святыні распрацаваў гродзенскі архітэктар Аляксандр Штэн. Касцёл пабудаваны з чырвонай цэглы ў класічным стылі, у форме крыжа, звонку ўпрыгожаны рэльефнымі выявамі, каля касцёла знаходзіцца аднапавярховы парафіяльны дом.