На выбарах у Беларусі раздавалі памяткі з іконай і малітвай

На выбарах у мясцовыя саветы, што прайшлі 18 лютага ў Беларусі, выбаршчыкам на некаторых участках уручалі сувеніры. У прыватнасці, у вёсках Гомельскага раёна ўсім, хто прыйшоў на ўчасткі для галасавання, уручалі памяткі ад МНС з інфармацыяй пра тое, як засцерагчыся ад пажараў. Памяткі ўтрымлівалі каляндар на 2018 год, а на вокладцы быў размешчаны абраз «Неапалімая Купіна», на які падобны абрысамі лагатып МНС Беларусі, і малітва да Найсвяцейшай Панны Марыі з просьбай аб абароне ад пажараў.

Неапалімая Купіна (даслоўна: «незгаральны куст») - гэта іконаграфічны тып Божай Маці ў праваслаўі. Абраз «Неапалімая Купіна» шануецца як заступнік пры пажарах. Цікава, што ў 2008 годзе прэзідэнт Украіны падпісаў указ, які ўстанавіў новае прафесійнае свята - Дзень выратавальніка Украіны, што адзначаецца ў дзень святкавання абраза Божай Маці «Неапалімая Купіна».

Дарэчы, у Беларусі Дзень выратавальніка адзначаецца 19 студзеня, калі праваслаўныя святкуюць Вадохрышча.