Сотні людзей, «Магутны Божа», словы святара: Вітольд Ашурак пахаваны ў Бярозаўцы
- Written by KATOLIK.LIFE
- Published in Соцыум
- Add new comment
За каталіцкага верніка, асуджанага і памерлага ў калоніі, маліліся ў касцёле - фота, відэа
У каталіцкай парафіі Спаслання Святога Духа ў Бярозаўцы Лідскага раёна развіталіся з Вітольдам Ашуркам, які памёр у шклоўскай калоніі. Каталіцкі вернік адышоў у вечнасць ва ўзросце 50 гадоў. У парафіі яго ведалі як удзельніка малітоўных груп, а затрымлівалі яго аднойчы з пацеркамі для Ружанца ў руках, калі Вітольд вяртаўся з малітвы. Пахавалі верніка таксама з пацеркамі ў руках.
Сотні людзей прыйшлі і прыехалі з іншых гарадоў на пахаванне Вітольда. На могілках ля труны прысутныя праспявалі беларускі духоўны гімн "Магутны Божа". Святар Андрэй Радзевіч падчас жалобнай святой Імшы ў касцёле на казанні зачытаў свой ліст да Вітольда. У ім святар працытаваў Эрыха Марыю Рэмарка, які пісаў пра тое, што «ў цёмныя часы добра відаць светлых людзей». Вітольд для яго быў адным з тых, хто сваім святлом асвятляў Беларусь.
Вернік памёр у калоніі пры нявысветленых абставінах. Яго цела аддалі сваякам на пяты дзень пасля смерці, пры гэтым галава была амаль цалкам схаваная бінтамі. На твары бачныя сляды ран. Напярэдадні Следчы камітэт заявіў аб тым, што асуджаны атрымаў цялесныя пашкоджанні ў вобласці твару «падчас падзення», і апублікаваў адпаведнае відэа. На запісе відаць, як знясілены мужчына хістаецца і раптам падае, удараючыся галавой. Пры гэтым, са слоў супрацоўнікаў калоніі, асуджаны «скаргаў на стан здароўя не выказваў, адмовіўся ад дапамогі і шпіталізацыі», гаворыцца ў інфармацыі.
Пад вартай Вітольд быў з 19 верасня 2020 года. Праваабаронцы прызналі яго палітычным зняволеным: на закрытым судзе мужчыну асудзілі на пяць гадоў калоніі, абвінаваціўшы па двух крымінальных артыкулах - за ўдзел у пратэстах пасля прэзідэнцкіх выбараў. Два тыдні ад мужчыны ніхто не атрымліваў лістоў, а ў адным са сваіх апошніх лістоў Вітольд распавядаў пра жоўтыя біркі на вопратцы асуджаных за пратэсты.
Media
Related items
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Мілыя фота з жывёламі ў Баранавічах выклалі манаскія асобы
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная
- Адпраўка ў войска ў Беларусі адбываецца з удзелам святароў
- Пацалунак пад абразом і цягнік з адным вагонам – чым дзеліцца парафія ў глыбінцы