Чырвоны касцёл у Мінску не адкрыюць у бліжэйшы час – улады назвалі новую прычыну

Падчас прэс-канферэнцыі ў Доме прэсы ў Мінску 13 чэрвеня Ўпаўнаважаны па справах рэлігій і нацыянальнасцяў Аляксандр Румак адказаў на пытанне журналіста пра тое, ці пачалася рэканструкцыя Чырвонага касцёла, закрытага ўжо больш за паўтара года па сумніўных прычынах.

Нагадаем, улады анансавалі пачатак рамонтных работ у храме ў першым квартале 2024 года. Аднак на зыходзе ўжо другі квартал, і ніякія працы ў касцёле не вядуцца.

«Распрацавана праектная дакументацыя. Улічваючы, што гэта вельмі маштабны аб'ект і працы, якія неабходна выканаць... Калі распрацоўваецца дакументацыя праектная, яна праходзіць экспертызу ў Дзяржаўнай экспертызе будаўнічай. І па праекце ў экспертызы ёсць заўвагі, і ў цяперашні час праектная дакументацыя дапрацоўваецца. Таму, калі будзе атрымана станоўчае заключэнне экспертызы, тады пачнуцца рамонтныя работы», – адказаў Румак.

Напярэдадні каталіцкая парафія святога Сымона і святой Алены ў Мінску апублікавала запрашэнне да малітвы «аб вяртанні святыні яго душпастырам і вернікам» да Слугі Божага, фундатара Чырвонага касцёла Эдварда Вайніловіча, які пабудаваў гэты храм у памяць аб сваіх памерлых дзецях.

Дарэчы, фота з апячатанымі дзвярыма Чырвонага касцёла – адно з самых частых у справаздачах пра паездку ў Мінск расійскіх турыстаў. Нярэдка такія здымкі суправаджаюцца пытаннямі аб тым, чаму храм дагэтуль зачынены.

Наш канал в Telegram – только интересное и важное. Подписаться >