Працэс над ксяндзом Генрыхам Акалатовічам адцягваецца з-за масавых судоў

Пачатак судовага працэсу над пробашчам каталіцкай парафіі ў Валожыне ксяндзом Генрыхам Акалатовічам адцягваецца. Нагадаем, следства па ягонай справе завершылася ўжо больш за месяц таму і чакалася, што суд будзе прызначаны ў кастрычніку. Аднак гэтага не адбылося – у раскладзе Мінскага абласнога суда, дзе павінны судзіць святара, справа ксяндза Генрыха так і не з'явілася.

Вернікі, якія ў курсе сітуацыі, пацвердзілі, што суд над святаром пакуль не прызначаны – ужо другі месяц ён чакае сваёй чаргі разгляду справы ў судзе.

Як мяркуецца, працэс пачнецца толькі ў сярэдзіне ці другой палове лістапада з-за вялікай загружанасці органаў. З раскладу суда бачна, што спраў разглядаецца сапраўды шмат, пераважна па палітычна матываваных артыкулах.

Як раз у сярэдзіне лістапада споўніцца год з таго часу, як ксёндз Генрых знаходзіцца ў зняволенні – у СІЗА КДБ у Мінску.

Суд па абвінавачванні ў «здрадзе дзяржаве» будзе праходзіць у закрытым рэжыме, таму вернікі не змогуць трапіць на працэс, каб падтрымаць святара ці хаця б убачыць яго.

Лісты ад яго ў апошні час практычна нікому не даходзілі. Па абрывачных звестках вядома, што ксёндз Генрых, у якога выразаны страўнік, не скардзіцца на ўмовы, трымаецца, ні ў чым вінаватым сябе не лічыць, просіць аб малітве і ўсю надзею ўскладае на Бога.

Наш канал в Telegram – только интересное и важное. Подписаться >