Найбольш шырока адзначылі 90-годдзе Барадуліна ў каталіцкай установе

90-годдзе з дня нараджэння Народнага паэта Беларусі Рыгора Барадуліна адзначылі ў дзяржаўных установах сціпла (у асноўным – кніжнымі выставамі), а найбольш шырока дату адсвяткавалі ў Хрысціянскім сацыяльным цэнтры ў Мінску – установе Каталіцкай царквы.

Такім чынам Касцёл у Беларусі працягвае заставацца адным з цэнтраў папулярызацыі беларускай культуры і мовы.

Літаратурна-музычная вечарына з удзелам арцыбіскупа эмэрыта Тадэвуша Кандрусевіча і грэка-каталіцкага архімандрыта Сяргея Гаека прайшла з аншлагам 26 лютага. Паведамлялася, што на імпрэзу запрасілі людзей, якія падарожнічалі разам з народным паэтам, складалі і спявалі песні на ягоныя вершы, выдавалі ягоныя кнігі. Гэта Алесь Камоцкі, Аляксандр Віслаўскі, Алеся Сівохіна, Алесь Квіткевіч.

Кожны, хто прачытаў на вечарыне ўлюбёныя радкі з твору класіка, атрымаў у падарунак кнігу паэзіі Рыгора Барадуліна – дарэчы, каталіцкага верніка. Завяршыўся вечар агульнай малітвай «Ойча наш».

Вялікі фотарэпартаж з імпрэзы апублікаваў на сваёй старонцы фатограф Віктар Ведзень.

Наш канал в Telegram – только интересное и важное. Подписаться >