«Дабрадзей» Касцёла Аляксандр Турчын стаў прэм'ер-міністрам Беларусі

Прэм'ер-міністрам Беларусі 10 сакавіка прызначаны Аляксандр Турчын, былы старшыня Мінскага аблвыканкама. Католікам ён вядомы як адзін з чыноўнікаў вышэйшага рангу, які кантактуе з прадстаўнікамі Касцёла, наведвае каталіцкія мерапрыемствы.

У пачатку 2025 года Турчын быў сярод тых, каго ў Мінска-Магілёўскай архідыяцэзіі РКЦ назвалі «дабрадзеямі» і ўзнагародзілі «за асабісты вялікі ўклад у аднаўленне і будаўніцтва каталіцкіх храмаў» архідыяцэзіі.

Турчын курыраваў аднаўленне пасля пажару Нацыянальнага санктуарыя ў Будславе, таксама наведваў Будслаўскі фэст у 2023 годзе.

Перад гэтым сустракаўся з прадстаўнікамі каталіцкага духавенства Беларусі і Апостальскім нунцыем.

«Абмяркоўвалі ў цэлым перспектыву супрацоўніцтва дзяржавы ў асобе Мінскага аблвыканкама і Рыма-каталіцкай царквы. Стаўленне ў двух бакоў пазітыўнае. Упэўнены, што мы можам прынесці шмат карысці адзін аднаму, а галоўнае – людзям», – казаў Турчын па выніках сустрэчы.

Ён узгадваў тады не толькі Будслаў, але і Стоўбцы, дзе мясцовы пробашч ксёндз Ігар Лашук праводзіць працы па аднаўленні гістарычнага касцёла і культу айца Фабіяна Малішоўскага.

Верагодна, цяперашні кіраўнік урада Беларусі мае каталіцкія карані. Ён нарадзіўся ў Навагрудку. Ягоны бацька Генрых быў партыйцам, працаваў у райвыканкаме. А пра больш далёкіх продкаў інфармацыя няма – магчыма, яны былі практыкуючымі католікамі.

Фота са старонкі Аляксандры Шчыглінскай.

Наш канал в Telegram – только интересное и важное. Подписаться >