Выйшлі на волю каталіцкія святары, асуджаныя ў Беларусі да доўгіх тэрмінаў

Абодва святары не прызнавалі сябе вінаватымі ў інкрымінаваных ім злачынствах. Вернікі таксама лічылі прысуды несправядлівымі і маліліся аб больш хуткім вызваленні вязняў.

Экс-пробашч парафіі ў Валожыне ксёндз Акалатовіч быў прысуджаны да 11 гадоў пазбаўлення волі па абвінавачванні ў «здрадзе дзяржаве» і прабыў у зняволенні больш за два гады.

Былы пробашч парафіі ў Шуміліне айцец Юхневіч, якога першапачаткова затрымалі паводле палітычна матываваных артыкулаў, пазней быў абвінавачаны паводле артыкулаў пра нібыта палавыя стасункі з непаўналетнімі і асуджаны да 13 гадоў пазбаўлення волі. Ён у зняволенні прабыў амаль паўтара года.

Увесь гэты час мы стараліся сачыць за лёсам святароў, інфармаваць пра іх, нагадваць аб несправядлівым зняволенні і неабходнасці малітвы аб больш хуткім вызваленні.

«Мы рады візіту ў Беларусь прадстаўніка Папы Рымскага кардынала Клаўдыё Гуджэроцці ў кастрычніку і дасягнутым дамоўленасцям. Ён даўні сябар Рэспублікі Беларусь, шмат зрабіў для Каталіцкага Касцёла ў нашай краіне, а таксама для развіцця дзяржаўна-касцёльнага і міжканфесійнага дыялогу», – гаворыцца ў паведамленні епіскапату.

Як адзначаецца, «яго візіт надаў пазітыўны імпульс для далейшых кантактаў, важным вынікам якіх стала рашэнне прэзідэнта Рэспублікі Беларусь у знак міласэрнасці і павагі да Папы Рымскага памілаваць і вызваліць каталіцкіх святароў, якія адбывалі пакаранне ў месцах зняволення».

Удзел у гэтым працэсе прымалі таксама Апостальскі нунцый Іньяцыё Чэффаліа і старшыня біскупскай Канферэнцыі арцыбіскуп Іосіф Станеўскі.

Наш канал в Telegram – только интересное и важное. Подписаться >