У Гродне паскардзіліся на пілігрымку. Чаму, і што адказалі незадаволеным?

Некаторыя жыхары Гродна паскардзіліся ў сацсетках на групу людзей, якая ішла гарадскімі вуліцамі з песняй праз гукаўзмацняльнікі. Адно з такіх паведамленняў набрала больш за 60 тыс. праглядаў і амаль 200 каментароў.

Жыхарка мікрараёна Дзевятоўка апублікавала відэа і напісала, што хацела выспацца пасля начной змены, але прачнулася ў нядзелю а 9 раніцы праз гучную песню.

Мы пазналі на відэа пешае паломніцтва католікаў, якое ў той дзень выйшла з Гродна ў Тракелі.

У каментарах жанчыне таксама распавялі, што гэта была пілігрымка, якая нічога не парушыла. Патлумачылі, што «людзі спяваюць, каб зняць стомленасць, падтрымаць адзін аднаго, падняць настрой і лягчэй прайсці доўгі шлях».

Аўтара паведамлення заклікалі парадавацца, што ў пілігрымцы шмат моладзі. Але некалькі карыстальнікаў падтрымалі незадаволенасць жыхаркі Гродна і заявілі, што такое гучнае вызнанне сваёй веры — гэта «праява непавагі да няверуючых».

Таксама пад пастом з'явіліся традыцыйныя скаргі на «шумныя» службы ў праваслаўных храмах — з-за гучнагаварыцеляў, якія выходзяць на вуліцу, і на гук званоў, які таксама некаторым перашкаджае.

Адзначым, што ў Беларусі ўжо былі выпадкі, калі некаторыя каталіцкія парафіі пасля скаргаў грамадзян абавязвалі адключаць або зніжаць гук перазвону.