МНС: касцёл пад Астраўцом згарэў з-за электраправодкі
- Written by katolik-gomel.by
- Published in Царква
- Add new comment
У святыні XVIII стагоддзя служыў вядомы паэт-святар Казімір Сваяк.
Каля 6 раніцы 6 ліпеня мясцовая жыхарка паведаміла ў МНС пра пажар у вёсцы Клюшчаны Астравецкага раёна. Прачнуўшыся, жанчына звярнула ўвагу на трэск, і ўбачыла языкі полымя, што вырываюцца з вокнаў касцёла Святога Яхіма.
Да моманту прыбыцця ратавальнікаў драўляны будынак палаў, дах абрынуўся ўнутр. У выніку агонь цалкам знішчыў будынак. У апошні раз служба ў храме праводзілася ў нядзелю. Прычына пажару высвятляецца. Асноўная версія - няспраўнасць электрасетак і электраабсталявання, паведамляе Гродзенскае ўпраўленне МНС.
Cвятыня па нядзелях і святах збірала каля 150 вернікаў з больш чым дзесяці навакольных вёсак. Як расказаў Catholic.by пробашч парафіі кс. Анатоль Захарэўскі, табернакулюм захаваўся, але паплавіўся. У сакрыстыі знаходзіўся абраз св. Юрыя, але загінуў у агні.
Паводле слоў святара, за два тыдні да здарэння на адмысловай нарадзе ў Астравецкім райвыканкаме прымалася рашэнне аб уключэнні касцёла ў Клюшчанах у спіс помнікаў, якія знаходзіліся б пад аховай дзяржавы. Але клюшчанская святыня так і не ўвайшла ў гэты спіс.
Клюшчанскі касцёл быў пабудаваны ў 1726 годзе і дзейнічаў да 1948 года, калі быў закрыты савецкай уладай. У 1990-я яго аднавілі і адбудавалі. Паўторнае пасвячэнне святыні адбылося ў 1993 годзе.
Касцёл у Клюшчанах — месца, дзе нёс служэнне кс. Канстанцін (Кастанты) Стэповіч (паэтычны псеўданім — Казімір Сваяк). Якраз у гэтым касцёле ў 1915 годзе ён прамовіў адно з першых сваіх казанняў на беларускай мове, што ў той час было ў навінку.
У клюшчанскай парафіі Казімір Сваяк арганізаваў парафіяльны хор, у якім іграў на скрыпцы і спяваў. Таксама дзякуючы намаганням святара ў наваколлі была арганізавана праца некалькіх школ з беларускай мовай навучання.
Related items
- Фэст у лясной капліцы з незвычайнай гісторыяй святкавалі капуцыны і пілігрымы
- І ў горадзе, і ў вёсцы: фестываль арганнай музыкі пройдзе ў касцёлах Беларусі
- Такі падарунак – толькі ад байкераў. Мотасезон яны адкрылі ў касцёле
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Беларусы даказваюць у судах «польскія карані» – з дапамогай веры