Занядбаны сучасны храм заўважылі на Міншчыне. Чаму так?

У сацсетцы з'явіўся свежы здымак капліцы, на якім мы пазналі каталіцкі храм святых апосталаў Пятра і Паўла ў вёсцы Лукавец Вілейскага раёна. На фота бачна, што будынак і тэрыторыя навокал знаходзяцца ў занядбаным стане. Раней іншыя турысты звярталі ўвагу на тое, што гэты храм заўсёды зачынены і выглядае закінутым. Чаму так – адказаў не знаходзілі.

Высветлілі, што парафію ў гэтай вёсцы зарэгістравалі ў 1999 годзе, яна збіралася ў часовым будынку – былым дзіцячым садку, які перарабілі пад капліцу. Але цяпер парафія знікла са спісу Вілейскага дэканату.

У той жа час у Адзіным дзяржаўным рэгістры юрыдычная асоба «Рымска-каталіцкая парафія Святых Апосталаў Пятра і Паўла ў вёсцы Лукавец Вілейскага раёна» дагэтуль пазначаная як не ліквідаваная, а дзеючая.

Гэта можа паказваць на тое, што з баланса юрасобы не зняты будынак капліцы, таму рэлігійную арганізацыю не ліквідуюць. Але фактычна парафія, на жаль, перастала існаваць. Раней мы распавядалі пра падобную сітуацыю ў Чэрыкаве на Магілёўшчыне.

Наш канал в Telegram – только интересное и важное. Подписаться >