У Кіеве адкрылі вуліцу і мурал святога Яна Паўла II

У Кіеве 15 кастрычніка ўрачыста адкрылі вуліцу імя святога Папы Рымскага Яна Паўла II і мурал з яго выявай, які знаходзіцца на сцяне пяціпавярховага дома ў Пячэрскім раёне сталіцы Украіны. Нагадаем, раней вуліца называлася імем Патрыса Лумумбы, але па рашэнні Кіеўскай гарадской рады дэпутатаў была перайменавана ў гонар вялікага польскага святога.

Мурал намаляваў аўстрыйскі мастак, якога спецыяльна запрасілі ў Кіеў. Аднак у ноч на 14 кастрычніка невядомыя апаганілі малюнак абразлівымі надпісамі ў адрас Польшчы. Распачата крымінальная справа, праваахоўнікі шукаюць вінаватых у «парушэнні раўнапраўя грамадзян у залежнасці ад іх расавай, нацыянальнай прыналежнасці або адносін да рэлігіі», паведамляе ў Фэйсбуку паліцыя Кіева.

Падчас урачыстага адкрыцця мурала прагучала віншаванне Папы Францішка, якое перадалі з Ватыкана. Пантыфік паведаміў, што дабраслаўляе мерапрыемства і падтрымлівае ўлады ўкраінскай сталіцы ў рашэнні назваць вуліцу ў гонар знакамітага Пантыфіка. Ва ўрачыстай частцы ўдзельнічалі прадстаяцель Украінскай грэка-каталіцкай царквы Святаслаў Шаўчук, польскі амбасадар у Украіне.

- Жадаю ўсім кіяўлянам не проста хадзіць па вуліцы Івана Паўла ІІ, а ісці шляхам, дарогай, якую ён нам паказаў, - сказаў іерарх. - Ён будаваў адзінства паміж краінамі, паміж народамі.