Улады адмовілі католікам Беларусі ў выходным дні 1 лістапада
- Written by Katolik.life
- Published in Царква
- Comments (2)
Дадатковы непрацоўны дзень можа парушыць правы атэістаў, лічаць у апараце Упаўнаважанага па справах рэлігій і нацыянальнасцяў.
Паступіў адказ органаў дзяржаўнай улады Беларусі на петыцыю аб вяртанні статусу непрацоўнага дня 1 або 2 лістапада. Нагадаем, калектыўны зварот з больш за 1,8 тыс. подпісаў быў накіраваны ў Савет міністраў Беларусі, а таксама ў Адміністрацыю прэзідэнта. Асобны зварот дасылалі прэзідэнту Беларусі каталіцкія біскупы.
З Адміністрацыі прэзідэнта паведамілі, што ліст быў накіраваны ў Апарат Савета Міністраў. Адтуль прыйшоў больш падрабязны адказ, які падпісала намеснік Упаўнаважанага па справах рэлігій і нацыянальнасцяў Алена Радчанка, паведамляе Katolik.life.
Прадстаўнік улады піша аб тым, «зварот па пытанні абвяшчэння непрацоўным днём 1 лістапада, які з'яўляецца святам Усіх Святых па календары каталіцкай канфесіі, разгледжаны ў апараце Упаўнаважанага па справах рэлігій і нацыянальнасцей». Пры гэтым аб Дні памяці памерлых, які адзначаецца 2 лістапада, у адказе нічога не гаворыцца. Але аўтары петыцыі звярталі ўвагу менавіта на праблему працоўнага дня на «Дзяды», які адзначаюць не толькі католікі, але і грамадскасць у цэлым.
- У адпаведнасці з Законам Рэспублікі Беларусь «Аб свабодзе сумлення і рэлігійных арганізацыях» усе грамадзяне роўныя перад законам незалежна ад іх стаўлення да рэлігіі, - пішуць у адказе з апарата Упаўнаважанага па справах рэлігій і нацыянальнасцяў. - Права на свабоду веравызнання, замацаванае ў Канстытуцыі Рэспублікі Беларусь, не дае вернікам ніякіх пераваг перад грамадзянамі, якія прытрымліваюцца атэістычных перакананняў. У адваротным выпадку гэта парушыць прынцып раўнапраўя грамадзян.
Менавіта таму ў апараце Упаўнаважанага па справах рэлігій і нацыянальнасцяў лічаць, што «ў цяперашні час дапаўняць рэлігійныя святы, якія адзначаюцца ў Рэспубліцы Беларусь у якасці святочных дзён, яшчэ адным, і аб'яўляць яго непрацоўным днем, немэтазгодна».
Нагадаем, каталіцкія вернікі ва ўсім свеце, у прыватнасці, у Беларусі 1 і 2 лістапада наведваюць могілкі і моляцца за памерлых. У цэлым увесь лістапад у Каталіцкай царкве прысвечаны малітвам за памерлых, пры гэтым асаблівым днём з'яўляецца 2 лістапада. У народзе гэтае старажытнае свята памінання продкаў называюць «Дзяды». Да 1998 году 2 лістапада быў у Беларусі выхадным днём - нароўні з праваслаўнай Радаўніцай, якую адзначаюць увесну. Але ўказам прэзідэнта Беларусі ад 26 сакавіка 1998 г. № 157 "Аб дзяржаўных святах, святочных днях і памятных датах у Рэспубліцы Беларусь" Дзень памяці быў прызнаны святочным, аднак працоўным днём. Тады ж былі скасаваныя выходныя панядзелкі пасля Вялікадня, які праваслаўныя і католікі адзначаюць, як правіла, у розныя дні. Пры гэтым праваслаўная Радаўніца засталася непрацоўным днём.
Related items
- Святары ў войску: клірыка пінскага прыходу прызвалі ў ПДВ
- «Дзіця электрычкі» вандруе па Беларусі ў пошуках цікавых храмаў і драўляных хат
- Спальванне пудзіла і святы Казімір: у Гродне сумесцяць «Казюкі» з Масленіцай
- У Баранавічах не далі дазвол католікам на правядзенне гарадскога Крыжовага шляху
- Унікальны праект: беларусы ствараюць альбом на вершы святой Тэрэзы
А не оскорбляет ли чувства атеистов и католиков празднование православными "радуницы"
RSS-стужка каментароў гэтага запiсу