Пасля гульні ў футбол у Маладзечна памёр 16-гадовы хлопец
- Written by Katolik.life
- Published in Царква
- Add new comment
Літаральна за некалькі дзён да смерці ён паспеў пабываць у Будславе
У Маладзечна раптоўна памёр 16-гадовы хлопец. Пахавальная святая Імша адбудзецца ў мясцовым касцёле святога Піо ў суботу. Хлопец быў актыўным каталіцкім вернікам і літаральна за некалькі дзён да смерці вярнуўся з фэсту ў Будславе, куды прыйшоў з Маладзечна пешшу разам з пілігрымкай.
- Адышоў да нашага Пана Езуса Андрэй Сарока. Сёлета ён дапамагаў у нашай пілігрымцы, быў у радах групы парадку. Шмат хто з вас ведае яго асабіста, ён быў верным Хрысту да канца праз усе свае 16 гадоў, служыў Пану міністрантам пры алтары, і мы упэўнены , што Андрэй святы і цяпер разам з Панам назірае за намі з нябёсаў. Ён ужо ў вечнасці! - паведамляецца на старонцы пілігрымкі.
Там дадалі:
- Але засталіся бацькі, брат і сёстры, блізкія, родныя, сям'я, сябры - усе, хто яго любіў і ведаў. Таму просім аб малітве, бо яго родныя патрабуюць яе вельмі моцна. Вечны супакой дай яму, Пане!
Як стала вядома, Андрэю стала кепска падчас гульні ў міні-футбол - ён страціў прытомнасць, выратаваць яго не паспелі.
Можна сказаць, сімвалічна - пілігрымкай - хлопец скончыў сваё зямное падарожжа, паспеў памаліцца Божай Маці Будслаўскай, апошні раз на зямлі паслужыў Пану Богу, а цяпер сузірае Яго ў Небе.
Вечнай радасці, святла і супакою просім для Андрэя, для яго родных і блізкіх - Божай дапамогі, моцы і дара веры, а для ўсіх нас - разумення, што ўсё ў руках Божых, дара чування заўсёды разам з Езусам Хрыстом і гатоўнасці быць пакліканым Богам у любы момант, каб з чыстай душою прыйсці да Яго.
Related items
- Беларусы даказваюць у судах «польскія карані» – з дапамогай веры
- Не фэйкі і не хакеры: «Радыё Марыя» працягвае збор і тлумачыць непаразуменні
- У Ізраілі католікі з Беларусі спакойна перажылі атаку Ірана, але «вайна дастала»
- Без цуду, але з падтрымкай: як «Радыё Марыя» выходзіць з цяжкай сітуацыі
- Паранены святар, пасадка бульбы: як жывуць пры абстрэлах вернікі Харкава і рэгіёну