Цудоўнае з глыбінкі: два прыгожых свята адзначылі католікі ва усходнім і заходнім рэгіёнах Беларусі

Дзве падзеі, важныя для мясцовых каталіцкіх супольнасцяў, адбыліся 15-16 верасня ў рэгіёнах Беларусі. Аднак такія цудоўныя падзеі ўпрыгожваюць жыццё і ўсяго Каталіцкага касцёла краіны. Пра святочныя мерапрыемствы распавялі святары на сваіх старонках у сацсетках.

На ўсходзе, у Палескім рэгіёне – у Нараўлянскім раёне Гомельшчыны – адзначылі 25-годдзе кансэкрацыі касцёлаў у весцы Грушаўка і ў самім райцэнтры. Ксендз Януш Чарнамораў распавёў, што ўрачыстасці ўзначаліў Генеральны вікарый Пінскай дыяцэзіі біскуп Казімір Велікаселец. На свята ў Грушаўцы прыехаў старшыня Нараўлянскага райвыканкама, які звярнуўся з прывітальным словам да прысутных.

Назаўтра ўрачыстасць у Нароўлі прайшла пад акампанемент электроннага аргана, скрыпкі і трубы. Таксама ў нараўлянскай святыні біскуп Казімір благаславіў новыя дубовыя алтарныя наставы і абразы, напісаныя ў незвычайнай тэхніцы – па дрэве пігментамі на яечнай эмульсіі.

А на Захадзе – ў вёсцы Несутычы Навагрудскага раёна Гродзеншчыны – адбылося асвячэнне адноўленай старадаўняй капліцы. Як мы ўжо распавядалі, у капліцы цудам захавалася драўляная фігура Езуса Хрыста XVIII стагоддзя, якую таксама аднавілі [фота].

Наш канал в Telegram – только интересное и важное. Подписаться >

Тут урачыстасць узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі, распавёў пробашч навагрудскага касцёла ксендз Юры Жэгарын. Ніжэй – фотарэпартажы са святаў.