Пачаўся фэст у Будславе, дзе сабраліся пілігрымы з усіх куткоў Беларусі

У Будславе Мядзельскага раёна 5-6 ліпеня праходзіць фэст у гонар цудатворнага абраза Маці Божай Будслаўскай. У каталіцкі Нацыянальны санктуарый прыбылі паломнікі з розных куткоў Беларусі. У тым ліку пешшу і на роварах – 1982 асобы, абвясцілі падчас святой Імшы для пілігрымаў, якая адкрыла фэст вечарам у пятніцу.

Некалькі дзён вернікі ішлі з Мінска, Віцебска, Ліды, Смаргоні, іншых месцаў, а самая доўгая пілігрымка – з Баранавічаў – прайшла амаль 300 кіламетраў. Пілігрымы пераадольваюць шлях да Божай Маці з песнямі, малітвамі, нясуць да яе свае просьбы [глядзіце ніжэй відэа]

Генеральны вікарый Гродзенскай дыяцэзіі біскуп Уладзімір Гуляй агучыў інтэнцыі першай святой Імшы:

«Богу Усемагутнаму, Уладару Сусвету даручаю будучыню нашага Касцёла, нашага народа і нашай Айчыны, любімай сэрцу Беларусі. Каб Бог валадарыў у нашых сэрцах, каб мы заўсёды крочылі шляхам збаўлення, каб чалавек заўжды перамагаў зло дабром, крыніцай якога з'яўляецца Найсвяцейшае Сэрца Збаўцы».

Урачыстасці праходзяць пад дэвізам «Найсвяцейшае Сэрца Езуса – супакой і паяднанне нашае» па традыцыйным сцэнары: са святой Імшой для пілігрымаў і начной працэсіяй у пятніцу, Імшой апоўначы, моладзевай праграмай, набажэнствамі і галоўнай Імшой у суботу – яе будзе адпраўляць Апостальскі Нунцый арцыбіскуп Антэ Ёзіч.

Сёлета свята стане асаблівым – дзякуючы Інтранізацыі, гэта значыць прысвячэнню Каталіцкага Касцёла ў Беларусі і кожнага верніка Найсвяцейшаму Сэрцу Езуса. Трансляцыю асноўных мерапрыемстваў фэста вядзе канал Catholic.by [глядзіце ніжэй]