Шлях да Радзімы з Богам – беларусы замежжа праводзяць «дарослую» пілігрымку

Трэці раз пешае паломніцтва беларусаў замежжа праходзіць у Польшчы 20-27 ліпеня па маршруце Варшава – Кастамлоты, да санктуарыя на мяжы з Беларуссю. У шлях адправіліся 25 чалавек, якія за 7 дзён пройдуць 210 кіламетраў, распавёў суарганізатар пілігрымкі Арцём Ткачук.

Ён адзначыў, што ў паломніцтве разам ідуць людзі з самым разнастайным родам заняткаў:

«Інжынер, лекар, журналіст, айцішнік, мэнэджэр, навуковец, фінансіст, студэнт... Сярэдні ўзрост удзельнікаў – 33 гады, таму гэта пілігрымка сталая, глыбокая, малітоўная. Цуд Божы, што людзі збіраюцца, выходзяць у шлях, дзеля гэтага пакідаюць працу, бяруць адпачынак. Сёлета ў пілігрымцы шмат новых людзей, многія ідуць упершыню. Большасць удзельнікаў – з варшаўскага душпастырства беларускіх католікаў, але ёсць і такія, што прыехалі здалёк, з іншых гарадоў».

Арганізатары вырашылі не мяняць дэвіз пілігрымкі, бо ён застаецца актуальным – «З Богам да Беларусі»:

«Пайсці да Радзімы з Богам, несці Беларусі Бога. У парафіях па дарозе ўжо ведаюць, чакаюць нашу пілігрымку, прымаюць вельмі сардэчна, асабліва тут, побач з Беларуссю, з вялікай гасціннасцю – таму, адчуваем сябе як дома».

Дарэчы, у пілігрымцы ідуць маладыя сужэнцы – тыя самыя, што летась павянчаліся проста падчас паломніцтва, а цяпер адзначаюць першую гадавіну шлюбу.

Наш канал в Telegram – только интересное и важное. Подписаться >