Дзверы адчыняць не абавязкова. Што трэба ведаць пра асвячэнне аўтамабіля

Каталіцкая царква ўзгадвае 25 ліпеня святога Крыштафа, які лічыцца заступнікам кіроўцаў, маракоў, падарожнікаў і паломнікаў, таму ў гэты дзень і ў бліжэйшую нядзелю ў касцёлах праводзяць благаслаўленне кіроўцаў і транспартных сродкаў.

У дадзеным выпадку больш дарэчы слова не «асвячэнне», а менавіта «благаслаўленне» — паколькі ў гэты момант мы малітоўна заклікаем Божае дабраславенне на транспартны сродак. Гэта можа быць не толькі аўтамабіль – але і матацыкл, ровар, самакат.

У некаторых месцах прынята пры гэтым адчыняць дзверы аўто, падымаць капот і багажнік, каб вада трапіла ўнутр. Такая ж традыцыя ёсць у праваслаўных. Ці не з'яўляецца такое стаўленне да дабраславення праявай паганства (малітва як магічнае дзеянне), забабонамі?

Адзін са святароў Мінска-Магілёўскай архідыяцэзіі лічыць, што гэта проста глупства:

«Малітвай благаслаўляецца транспарт на добрую справу, а астатняе залежыць ад кіроўцы, і тут святая вада не дапаможа. Пакрапляць вадой увогуле не абавязкова. На жаль, не ўсе ўмеюць карыстацца логікай. Баюся, што ў лепшым выпадку чакаюць "загаду": каб сказаў ксёндз/бацюшка, а калі іх няма, любы іншы чалавек, сусед. Справа ў тым, каб людзі навучыліся самастойна разумець сутнасць, а не "так трэба, а так ні ў якім выпадку нельга"».

З іншага боку, святар з Гродзенскай дыяцэзіі ўпэўнены, што няма нічога кепскага, калі людзі выконваюць традыцыю і ставяцца да гэтага проста як мясцовага звычаю.

У цэлым, Касцёл нагадвае, што не варта ставіцца да благаслаўлення аўтамабіля як да нейкага магічнага рытуалу. Гэта не гарант таго, што машына ніколі не патрапіць у аварыю. Асвечаны – значыць, прысвечаны Богу. Благаслаўляючы машыну, як, зрэшты, і любую іншую рэч, Касцёл моліцца аб тым, каб яна стала для яе ўладальніка сродкам, які прыносіць не толькі матэрыяльную, але і духоўную карысць.

Благаслаўленне наўрад ці дапаможа, калі кіроўца будзе парушаць правілы дарожнага руху, паводзіць сябе на дарозе некарэктна ў адносінах да іншых, рызыкаваць бяспекай людзей – гэта ўвогуле грэх, які аддаляе ад Бога і можа пазбавіць благаслаўлення.

Дэкалог кіроўцы

Кіроўца, ты знаходзішся на дарозе не адзін. Усюды ёсць Пан Бог твой - заўсёды памятай пра гэта.

1. Не забівай.

2. Няхай дарога будзе для цябе тым, што аб’ядноўвае людзей, а не смяротнаю небяспекаю.

3. Няхай ветлівасць, карэктнасць і асцярожнасць дапамогуць табе выйсці з непрадбачаных сітуацый.

4. Аказвай міласэрнасць і ў выпадку патрэбы дапамагай бліжняму, асабліва калі ён з’яўляецца ахвярай дарожна-транспартнага здарэння.

5. Няхай аўтамабіль не будзе для цябе праяваю ўлады, панавання і нагодай для граху.

6. З любоўю пераконвай маладых і не толькі маладых вадзіцеляў не сядаць за руль, калі яны не ў стане кіраваць аўтамабілем.

7. Аказвай падтрымку сем’ям ахвяраў дарожна-транспартных здарэнняў.

8. Дапамажы ахвяры і вінаватаму ў аварыі сустрэцца ў адпаведны момант, каб яны маглі перажыць вызваленчы досвед прабачэння.

9. На дарозе аберагай слабейшага.

10. Адчувай сваю адказнасць за іншых.

 Малітва кіроўцы

Божа, дай мне ўпэўненую руку і зоркае вока, каб я нікому не прычыніў шкоды ў дарозе. Даўца жыцця, не дазволь, каб я стаў прычынаю смерці альбо прычынаю калецтва тых, каму Ты даў жыццё. Захавай, Пане, ад няшчасных выпадкаў тых, хто падарожнічае са мною. Навучы мяне карыстацца аўтамабілем для дабра маіх бліжніх і стрымай спакусу празмернай хуткасці. Учыні, каб хараство свету, створанага Табою, і радасць Тваёй ласкі заўсёды мне спадарожнічалі. Амэн.

Наш канал в Telegram – только интересное и важное. Подписаться >