Рэдкі выпадак: у дзяржаўнай лякарні адкрываюць каталіцкую капліцу

У Смаргонскім цэнтральным раённым шпіталі дазволілі адкрыць каталіцкую капліцу і выдзелілі для яе памяшканне. Гэта вынікае з абвесткі, якую мы заўважылі ў сторыс на старонцы парафіі святога Міхала Арханёла ў Смаргоні.

Праўда, патрабуецца рамонт памяшкання – на гэта мясцовыя вернікі пачалі збіраць ахвяраванні.

У Беларусі у многіх лякарнях ёсць праваслаўныя капліцы, у некаторых – малельныя пакоі, якімі карыстаюцца вернікі розных канфесій, а наяўнасць менавіта каталіцкай капліцы ў дзяржаўнай медустанове – рэдкасць для Беларусі. Такія капліцы шырока распаўсюджаны ў Польшчы і іншых каталіцкіх краінах.

Капліца ў Смаргоні будзе асвечана ў гонар абраза Маці Божай Барунскай, Суцяшальніцы Засмучаных – гэта адзін з найбольш шанаваных у Беларусі абразоў, які знаходзіцца ў касцёле ў вёсцы Баруны.

Капліцу размесцяць у дзіцячым корпусе лякарні. У памяшканні трэба атынкаваць сцены, адрамантаваць падлогу і столь. Таксама патрэбна напісаць патрэбныя для культу абразы, закупіць літургічныя рэчы, адзенне для святара – у капліцы будуць адпраўляць святыя Імшы.

Вернікаў просяць аб матэрыяльнай дапамозе, каб сабраць сродкі на ўсе выдаткі.

Наш канал в Telegram – только интересное и важное. Подписаться >