Вызваленых святароў прывезлі з Беларусі ў Ватыкан

Праз суткі пасля навіны аб вызваленні каталіцкіх святароў ксяндза Генрыха Акалатовіча і айца Анджэя Юхневіча афіцыйнай інфармацыі пра іх далейшы лёс пакуль не з'явілася. Аднак, як даведаліся вернікі, святароў адразу вывезлі за мяжу і цяпер яны знаходзяцца ў Ватыкане.

Тут чакаюцца сустрэчы з імі – у хуткім часе павінны з'явіцца афіцыйныя паведамленні. Калі святары змогуць вярнуцца ў Беларусь і што іх чакае далей – вернікам пакуль невядома.

Нагадаем, абодва святары не прызнавалі сябе вінаватымі ў інкрымінаваных ім злачынствах. Вернікі таксама лічылі прысуды несправядлівымі і маліліся аб больш хуткім вызваленні вязняў.

Экс-пробашч парафіі ў Валожыне ксёндз Акалатовіч быў асуджаны да 11 гадоў пазбаўлення волі па абвінавачванні ў «здрадзе дзяржаве» і прабыў у зняволенні больш за два гады.

Былы пробашч парафіі ў Шуміліне айцец Юхневіч, якога першапачаткова затрымалі паводле палітычна матываваных артыкулаў, пазней быў абвінавачаны паводле артыкулаў пра нібыта палавыя стасункі з непаўналетнімі і асуджаны да 13 гадоў пазбаўлення волі. Ён у зняволенні прабыў амаль паўтара года.

Увесь гэты час мы стараліся сачыць за лёсам святароў, інфармаваць пра іх, нагадваць аб несправядлівым зняволенні і неабходнасці малітвы аб больш хуткім вызваленні.

Наш канал в Telegram – только интересное и важное. Подписаться >