Гістарычны будынак кляштара знеслі ў Навагрудку – манахіні просяць дапамогі, каб пабудаваць новы

Гістарычны будынак кляштара сясцёр назарэтанак у Навагрудку цалкам разабралі ў межах рэканструкцыі. Гэта вынікае з відэа [глядзіце ніжэй], якое апублікавалі манахіні, з просьбай аб ахвяраваннях на пабудову новага будынка:

«Нашага кляштара ў Навагрудку ўжо няма, не засталося і фундаментаў».

Афіцыйнай інфармацыі пра гэта не было – як і тлумачэння, з чым звязаны знос будынка. Відаць, ён не адпавядаў сучасным патрабаванням.

На кадрах у канцы роліка заўважна, што ўжо распачата будоўля новага кляштара. Мяркуючы па фрагментах з праекту, будынак будзе большым, трохпавярховым – такім чынам, сёстры змогуць несці служэнне ў лепшых умовах.

Вядома, што гістарычны будынак пачалі разбіраць у красавіку, а ў траўні з'явілася відэа, на якім заўважна, што будынак ужо амаль разабралі. У каментарах мясцовыя жыхары напісалі, што кляштар назарэтанак на гэтым месцы застанецца – тут плануюць узвесці новы будынак.

Каб сабраць на яго сродкі, сёстры цяпер звярнуліся па дапамогу.

Знесены будынак не быў у спісе гісторыка-культурных каштоўнасцяў, аднак меў вялікае духоўнае і гістарычнае значэнне. Менавіта тут служылі 11 сясцёр-назарэтанак, благаслаўлёных мучаніц, расстраляных нацыстамі.

Гэты кляштар быў адкрыты ў хуткім часе пасля таго, як сёстры назарэтанкi прыбылi ў Навагрудак у 1929 годзе па запрашэнні тагачаснага бiскупа Зыгмунта Лазiнскага, каб займацца выхаваннем дзяцей i моладзi, апекавацца касцёлам Перамянення Пана (Белай Фарай).

Падчас вайны кляштар забралі ў назарэтанак і вярнулі яго манахіням у 1990-х гадах. На працягу 30 гадоў тут праводзілі заняткі з дзецьмі і моладдзю, «Канікулы з Богам». Таксама гэта адзінае месца ў Гродзенскай вобласці, дзе сёстры выпякаюць гостыі, аплаткі на вігілійны стол.