Арцыбіскуп Кандрусевіч – зноў на службе пасля месяца лячэння

Жнівень 24, 2026
Written by KATOLIK.LIFE
Published in Царква
Add new comment

Неўзабаве пасля завяршэння рэабілітацыі 80-гадовы арцыбіскуп-эмерыт вярнуўся да актыўнага служэння.

Неўзабаве пасля завяршэння рэабілітацыі з нагоды аперацыі на сэрцы арцыбіскуп-эмерыт Тадэвуш Кандрусевіч вярнуўся да актыўнага служэння. 80-гадовы іерарх здзейсніў першы пасля хваробы душпастырскі візіт – у парафію у Ракаве.

Тут 23 жніўня святкавалі 30-годдзе парафіяльнага хору. З гэтай нагоды парафія запрасіла арцыбіскупа ўзначаліць свята ў касцёле. Ён далучыўся нават да спеваў хору, як заўважна на апублікаваных парафіяй здымках.

На працягу месяца ганаровы іерарх, які часта наведвае парафіі ў розных кутках Беларусі, нягледзячы на ўзрост і хваробы, не меў магчымасці здзяйсняць душпастырскія візіты. Яго тэрмінова шпіталізавалі 22 ліпеня пасля ўдзелу ў фэсце ў Гудагаі. Дзякуючы гэтаму прадухілілі чарговы інфаркт і правялі стэнціраванне сасудаў.

Вернікі маліліся аб хутчэйшым выздараўленні арцыбіскупа-эмерыта і працягваюць прасіць Бога аб неабходных ласках для яго.