«Боль для ўсіх нас». Яшчэ адзін святар вымушана пакідае Беларусь – пасля 32 гадоў служэння

У парафіі Найсвяцейшай Тройцы ў Ружанах 29 жніўня запланавана святая Імша з удзелам святароў Пружанскага і Кобрынскага дэканатаў. Узначаліць яе біскуп Пінскі Антоні Дзям’янка, які напярэдадні звярнуўся з паведамленнем да вернікаў.

Іерарх са смуткам паведаміў, што Пінская дыяцэзія не атрымала ад дзяржаўных уладаў узгаднення на далейшае служэнне пробашча ў Ружанах. Гэта грамадзянін Польшчы, ксёндз Януш Пуліт, які на працягу 32 гадоў быў душпастырам парафій у Ружанах і Лыскаве.

Біскуп падкрэсліў, што ў сувязі з малалікасцю мясцовых святароў і скарачэннем колькасці польскіх ксяндзоў Пінскай дыяцэзіі вельмі складана забяспечыць усе парафіяльныя супольнасці ад Брэста да Гомеля рэгулярнай душпастырскай апекай.

Паведамленне было апублікавана 27 жніўня, а падпісана – 20 жніўня. Відаць, адмову ў дазволе прасілі перагледзець і чакалі новага рашэння, але надзея не апраўдалася.

«Шматгадовы пробашч ад’язджае не па сваёй волі. Гэта боль для ўсіх нас. Але мы – біскупы і святары – будзем дапамагаць і падтрымліваць вас, разам трываючы ў духу хрысціянскай веры, надзеі і любові», – адзначыў біскуп.

З пачатку 2026 года гэта трэці польскі святар Пінскай дыяцэзіі, якому адмовілі ў працягу дазволу на рэлігійную дзейнасць у Беларусі.

Наш канал в Telegram – только интересное и важное. Подписаться >