Курсы «Мова нанова» выклікалі вялікую цікавасць гомельцаў

У нядзелю ў Гомелі прайшлі першыя заняткі бясплатных курсаў беларускай мовы «Мова нанова». Такім чынам, Гомель стаў апошнім з абласных цэнтраў, дзе адкрыліся курсы, заснаваныя філолагам Алесяй Літвіноўскай і журналістам Глебам Лабадзенкам. Таксама заняткі праходзяць у Мінску і яшчэ дзевяці гарадах.

Першыя заняткі ў Гомелі стварылі сапраўдны аншлаг, іх наведалі каля 70 чалавек, у тым ліку некалькі парафіянаў гомельскага касцёла, а ў асноўным - моладзь.

- Прыемна, што на курсы прыходзяць людзі незаангажаваныя, што прыходзяць рускамоўныя, што гэта не «свая тусоўка». Таму што ў гэтым наша мэта - прывабліваць новых людзей да беларускай мовы, культуры, - зазначыў для інфармацыйнага агенцтва БелаПАН Глеб Лабадзенка. - Кожны раз мы прапаноўваем нешта новае, большасць тэм выбіраецца пад гасцей. Напрыклад, калі гаворым на тэму кавярні ці рэстарана - то запрашаем адпаведна беларускамоўнага афіцыянта. Стараемся, каб былі музыкі, было маленькае свята раз на тыдзень.

Канцэпцыя курсаў - неакадэмічнае вывучэнне мовы, робіцца гэта ў інтэрактыўных формах. Заняткі ў Гомелі ладзяцца па нядзелях у філіяле Веткаўскага музея стараабрадніцтва і беларускіх традыцый. Вядучыя курсаў - журналісты Мікола Бянько і Юлія Сівец.