ФОТА: каля 40 дзяцей вучацца веры ў гомельскім касцёле

У нядзелю ў гомельскай рыма-каталіцкай царкве пачаліся заняткі ў Нядзельнай школе, дзе ў духу любові, без строгіх патрабаванняў і складаных правілаў дзяцей у даступнай гульнявой форме вучаць асновам хрысціянскай веры. Дзеці малююць, спяваюць, рыхтуюць тэатральныя сцэнкі. Адна з груп дзяцей пачала падрыхтоўку да прыняцця Першай камуніі.

Нядзельная школа працуе ў гомельскім касцёле ўжо больш за 20 гадоў. Для маленькіх дзяцей, якім яшчэ рана ісці ў Нядзельную школу, у Доме міласэрнасці праводзяцца заняткі па праграме «Добры пастыр». У цэлым нядзельную катэхізацыю у гомельскай каталіцкай парафіі праходзяць каля 40 дзяцей.

- У Нядзельнай школе вучаць таксама пачынаць самастойныя адносіны з Ісусам - бо Ён самы лепшы сябар, які ніколі не падвядзе, заўсёды выслухае і зразумее, - кажа пробашч, айцец Славамір. - Тады, трошкі пасталеўшы, дзеці змогуць самі маліцца і ісці ў святыню нават у тыя моманты, калі гэтага па нейкіх прычынах не робяць бацькі.