Пасол Ватыкана - студэнтам Гомельскага медуніверсітэта: глядзіце ў вочы пацыентаў, кожны з іх - асоба [фота]
- Written by gomel.catholic.by
- Published in Навіны - Гомель
- Add new comment
«Рэлігія і Касцёл не імкнецца абмежаваць свабоду. Мы абараняем голас слабых, калі іх перастаюць паважаць, - бо гэта голас самога Бога».
У другі дзень свайго візіту ў Гомель Апостальскі Нунцый у Беларусі арцыбіскуп Клаўдыё Гуджэроцці сустрэўся са студэнтамі Гомельскага дзяржаўнага медыцынскага універсітэта. На своеасаблівай лекцыі прадстаўніка Ватыкана сабраліся першакурснікі медыка-дыягнастычнага факультэта.
Арцыбіскуп шмат жартаваў са студэнтамі і выкарыстоўваў свае выкладчыцкія навыкі, каб аўдыторыя не губляла цікавасць да яго выступлення. Даступнай мовай госць растлумачыў, чаму Касцёл выступае супраць абортаў і сумніўных генетычных даследаванняў, чаму не варта спадзявацца на грошы, чаму многія сужэнцы разводзяцца і адкуль так шмат пакутаў у сучасным свеце.
Апостальскі нунцый падкрэсліў, што ў кожным чалавеку захаваны вобраз Бога, і заклікаў студэнтаў да разумення глыбіні таямніцы чалавека. Арцыбіскуп адзначыў, што такія ж правы на жыццё, як і ўсе, маюць дзеці-інваліды і кожнае зачатае дзіця:
- Рэлігія і Царква не імкнецца абмежаваць свабоду, як многія думаюць. Мы абараняем голас слабых, калі іх перастаюць паважаць, - бо гэта голас самога Бога, - канстатаваў Арцыбіскуп.
Апостальскі нунцый параіў будучым дактарам лячыць хворых не як машын, з якіх можна атрымаць грошы, а бачыць перад сабой асобы, глядзець у вочы пацыентам, каб лепш разумець іх.
Студэнты ж пыталіся ў Апостальскага нунцыя, чаму ён вырашыў стаць святаром, ці ёсць у чалавека лёс і як здабыць ўнутраную гармонію.
- Хрысціяне вераць не ў лёс, але ў тайны план Бога на жыццё кожнага чалавека. Калі мы пакутуем, то робім гэта разам з распятым Хрыстом. Пазней мы пачынаем разумець, што ўсе тыя падзеі, якія здараліся з намі, складваюцца ў гісторыю Божай любові.
Related items
- З паходнямі і ў касцюмах: вуліцамі гарадоў Беларусі правялі Крыжовы шлях
- Дзе глядзець відэа-онлайн на Вялікдзень-2024 – падборка прамых трансляцый з касцёлаў
- Упершыню за пяць гадоў Крыжовы шлях прайшоў у цэнтры Гродна і сабраў сотні ўдзельнікаў
- Штосьці незвычайнае зладзілі ў мінскім касцёле: набажэнства спалучылі з перфомансам
- Opus Dei адказаў на абвінавачванні FT у «эксплуатацыі»