Дзве маладыя пары хрысцілі нованароджаных у касцёле [ФОТА + Што павінен рабіць хросны]
- Written by katolik-gomel.by
- Published in Навіны - Гомель
- Add new comment
Пры хросце бацькі просяць для дзіцяці не здароўя, шчасця і дабрабыту...
У нядзелю ў гомельскім касцёле яшчэ два чалавекі атрымалі дар хросту. Дзве маладыя пары прынеслі ў каталіцкую царкву сваіх нованароджаных дзяцей, каб прасіць для іх веры і вечнага жыцця. Ласку Святога Духа і прабачэнне першароднага граху атрымалі маленькія Адрыяна і Міраслава. Дарэчы, сакрамэнт хросту здзейсніў кс. Кшыштаф Запала падчас сваёй апошняй Імшы ў Гомелі - святар вяртаецца на радзіму, у Польшчу, каб там вандраваць і служыць справе евангелізацыі. Парафіяне падзякавалі ужо былому вікарыю за два гады служэння ў Гомелі.
Аб сакрамэнце хросту і абавязках хросных бацькоў распавядае пробашч гомельскай парафіі айцец Славамір Ласкоўскі.
- Бацькі павінны разумець, што, прыносячы сваё дзіцяці для хросту, яны просяць для яго ў Госпада веры і жыцця вечнага, а не здароўя, шчасця, дабрабыту, - нагадвае святар. - А хросныя павінны дапамагаць бацькам перадаць веру дзіцяці, навучыць шукаць і выконваць у сваім жыцці Волю Божую, любіць Бога і бліжняга. Хрост - гэта брама, праз якую чалавек уваходзіць у стасункі з Богам. Гэта стасункі жывыя дзякуючы ласцы Духа Святога, якая даецца пры хросце. Таксама пасля гэтага сакрамэнту чалавеку прабачаецца першародны грэх і ўсе грахі, учыненыя да хрышчэння.
Перадача веры з'яўляецца адной з галоўных задач хрысціянскіх сужэнцаў. Сур'ёзна дапамагаць ім у гэтым павінны і хросныя бацькі. Роля хросных - не толькі пагуляць на хрэсьбінах і дарыць хрэснікам падарункі на Каляды і Дзень нараджэння. Згаджаючыся быць хросным, чалавек бярэ на сябе цалкам вызначаную і даволі вялікую адказнасць. Яго абавязак - зрабіць усё магчымае для таго, каб дзіця вырасла сапраўдным хрысціянінам, а не насіла гэтае імя толькі фармальна.
Хросны абавязкова павінен сачыць за тым, як выхоўваюць яго хрэсніка бацькі, сам мець стасункі з ім і раскрываць для яго праўды веры, далучаць да сакрамэнтаў, дапамагаць вадзіць у Нядзельную школу, і да канца свайго зямнога жыцця заўсёды маліцца за яго. Нават калі з Царквы сыдуць бацькі, хросны абавязаны клапаціцца пра духоўнае жыццё хрэсніка.
Related items
- Напярэдадні Вялікадня праваслаўны архіепіскап наведаў каталіцкі цэнтр у Гомелі
- Фэст у лясной капліцы з незвычайнай гісторыяй святкавалі капуцыны і пілігрымы
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп
- І ў горадзе, і ў вёсцы: фестываль арганнай музыкі пройдзе ў касцёлах Беларусі
- Такі падарунак – толькі ад байкераў. Мотасезон яны адкрылі ў касцёле