Гомельская моладзь адсвяткуе Раство з суполкамі Тэзэ ў Страсбургу [відэа]

Еўрапейская сустрэча моладзі суполак Тэзэ пройдзе ў прыгранічным з Германіяй французскім рэгіёне Эльзасе і прылеглым да яго з другога боку мяжы Бадэне з 28 снежня 2013 года па 1 студзеня 2014 года. Галоўныя падзеі будуць адбывацца ў французскім Страсбургу.

Гэтая сустрэча арганізуецца суполкай Тэзэ па запрашэнні каталіцкай і пратэстанцкай Цэркваў па абодва бакі Рэйна. Яна збярэ разам некалькі дзесяткаў тысяч маладых людзей усіх хрысціянскіх канфесій на новы этап « паломніцтва даверу на зямлі», пачаты братам Ражэ ў канцы 70-х гадоў. Моладзь з усёй Еўропы і іншых краін будуць прымаць у парафіі і суполкі жыхары рэгіёну.

Моладзь гомельскай рыма-каталіцкай парафіі на чале з айцом Дамінікам таксама прыме ўдзел у сустрэчы. У касцёле пачалаўся запіс на паездку, якая запланавана на 25 снежня - 4 студзеня.

На сустрэчу суполак Тэзэ варта прыехаць, каб маліцца ў спевах і цішыні ў горадзе - гэта знак і сімвал прымірэння:

- Ісці да крыніцы веры і любові разам з дзесяткамі тысяч маладых людзей з Еўропы і з усяго свету, пазнаёміцца з гасціннасцю сем'яў Эльзаса і Бадэна, сустрэцца з людзьмі, якія сведчаць аб Евангеллі, пераадольваючы цяжкасці сённяшняга дня, тварыць Еўропу, адкрываючы яе сацыяльныя інстытуты і каштоўнасці, - кажуць арганізатары.

Нагадаем, у мінулым годзе гомельская моладзь наведвала аналагічную Еўрапейскую сустрэчу ў Рыме.