Тры дэлегацыі ад Беларусі ўдзельнічалі ў пахаванні Папы Францішка

У Ватыкане 26 красавіка прайшло пахаванне Папы Рымскага Францішка. На цырымонію прыбылі каля 160 дэлегацый, сярод якіх было 53 кіраўніка дзяржаў і 12 дзеючых манархаў. Вялася прамая трансляцыя пахавальнай Імшы і руху картэжа (глядзіце ніжэй).

Сярод дэлегацый – тры прадстаўлялі Беларусь. Дэлегацыю ад Рыма-каталіцкай царквы ў Беларусі ўзначаліў арцыбіскуп Юзаф Станеўскі, ад дзяржавы – старшыня Палаты прадстаўнікоў Ігар Сяргеенка. Таксама Святы Пасад запрасіў на пахаванне Пантыфіка дэлегацыю ад дэмакратычных сіл Беларусі, якія знаходзяцца ў вымушанай эміграцыі. Яе ўзначаліў практыкуючы рыма-католік, дарадца па пытаннях дыпламатыі Дзяніс Кучынскі.

Цікава, што год таму Папа Францішак зацвердзіў абрад уласнага пахавання. Гэта адбылося 29 красавіка 2024 года, а апублікавалі дакумент «Парадак пахавання Рымскага Пантыфіка» за пяць месяцаў да смерці Францішка – 20 лістапада.

Дзякуючы ўнесеным зменам абрад выглядае як пахаванне пастыра, а не манарха, адзначылі ў Ватыкане. Напрыклад, цела Пантыфіка выстаўлялася для развітання ў труне, а не на катафалку, як рабілася раней. Замест трох традыцыйных трунаў з кіпарыса, свінцу і дуба выкарыстоўвалася простая драўляная труна.

Развітацца з Францішкам прыйшлі каля 250 тысяч чалавек, у тым ліку – беларускія біскупы, якія адстаялі ў велізарнай чарзе ў апошні дзень развітання. Фота: catholicminsk.by

«Абноўлены абрад мае на мэце паказаць, што здзяйсняецца пахаванне пастыра і вучня Хрыста, а не моцнага свету гэтага», – каментаваў кіраўнік Службы папскіх літургічных набажэнстваў.

Наш канал в Telegram – только интересное и важное. Подписаться >