«Народ, які пакутуе ў цішыні». Кардынал Гуджэроцці – пра беларусаў

Упершыню пасля наведвання Беларусі прэфект Дыкастэрыі па справах Усходніх Цэркваў, новапрызначаны кардынал Клаўдыё Гуджэроцці, пракаментаваў свой візіт. Падрабязнасцяў аб праведзеных тут сустрэчах і перамовах ён пакуль не раскрыў, аднак некаторымі ўражаннямі падзяліўся з Vatican News.

Свой удзел ва ўрачыстасцях у Будславе ватыканскі іерарх пракаментаваў так: «Цудоўнае свята народа, які пакутуе ў цішыні і які знайшоў у веры такую відавочную, на наш погляд, моц сведчання». Паводле Гуджэроцці, выява Маці Божай Будслаўскай з'яўляецца для беларусаў «знакам ідэнтычнасці і надзеі».

Ён быў асабліва ўражаны тым, што ў рэгіёне, дзе суседнія народы змагаюцца адзін з адным, некалькі тысяч чалавек ішлі пешшу па лясах, сярод азёр, па складаных дарогах, маліліся на каленях і праяўлялі салідарнасць адно з адным.

Узгадваючы свой досвед у Беларусі, Украіне і Грузіі, дзе ён быў нунцыем, Гуджэроцці папярэдзіў пра складаныя гістарычныя прычыны, якія стаяць за падзеямі ў гэтых рэгіёнах. На яго думку, людзі на захадзе ў сваіх «спрошчаных» каментарах гэтых падзей часта абмяжоўваюцца сённяшнім днём. «На ўсходзе ж, калі вы жадаеце зразумець сёння, вы павінны зразумець учора», - лічыць іерарх.

На яго думку, на захадзе не адбылося ўсведамлення, глыбокага асэнсавання падзення Савецкага Саюза, новых шляхоў, якія адкрыліся пасля яго распада, але таксама і трагедый савецкага народа, якія ён выклікаў.

Наш канал в Telegram – только интересное и важное. Подписаться >

У прыватнасці, новапрызначаны кардынал лічыць, што пасля распаду СССР «вельмі складаная сітуацыя агаліла нервы савецкіх людзей і прывяла да адраджэння нацыяналізму, канфрантацыі, эканамічных цяжкасцей, феномену алігархаў».