Вядомая верніца, вучоная раптоўна памерла ў Віцебску

Кандыдат гістарычных навук, дацэнт Віцебскага дзяржаўнага ўніверсітэта імя Машэрава, тэолаг, вядомая каталіцкая верніца Кацярына Лаўрыненка адышла ў вечнасць 3 сакавіка. Яна памерла ў лякарні, куды трапіла з двухбаковым запаленнем лёгкіх 25 лютага. А літаральна 23 лютага Кацярына адзначала сваё 48-годдзе.

На сваёй старонцы ў сацсетцы верніца прасіла аб малітве ў сувязі з хваробай — гэта яе апошні допіс. Праз тыдзень яна памерла, а апошнія дні была без прытомнасці, знаходзілася на штучнай вентыляцыі лёгкіх.

На дадзены момант на сайце ВДУ імя Машэрава няма дадзеных аб Кацярыне Лаўрыненка. Яна звольнілася пасля падзей 2020 года. У той час яна адкрыта каментавала грамадска-палітычны крызіс у Беларусі ў прывязцы да Каталіцкай Царквы.

«На біскупаў і святароў аказваецца ціск, каб яны не выказваліся з нагоды правоў чалавека», — казала Кацярына ў інтэрв'ю міжнародным хрысціянскім медыя, адзначаючы, што негалосна многія вернікі дапамагаюць пацярпелым.

У апошнія гады вучоная працавала ў структурах Каталіцкай Царквы, выкладала гісторыю і кананічнае права.

«Яна вельмі любіла жывёл, апекавалася імі. Была добрым, чулым чалавекам. Любіла хадзіць у пешыя пілігрымкі, фатаграфаваць пейзажы роднага краю», — распавяла пра Кацярыну яе сяброўка.

Нагадаем, Папа Рымскі Францішак таксама знаходзіцца ў лякарні з двухбаковай пнеўманіяй — ужо каля трох тыдняў медыкі змагаюцца за ягонае жыццё.

Наш канал в Telegram – только интересное и важное. Подписаться >