Ля Чырвонага касцёла ў Мінску быў здзейснены акт вандалізму

Каля закрытага больш за два з паловай гады Чырвонага касцёла ў Мінску невядомы парэзаў нажом абраз Езуса Міласэрнага, які размешчаны ў выглядзе банэра каля ганка храма. Калі пашкоджанне абраза заўважылі ў парафіі, яго змацавалі, але сляды блюзнерства засталіся.

Відаць, што хтосьці зрабіў надрэз у ніжнім правым куце банэра, а самыя вялікія пашкоджанні добра заўважныя проста каля аблічча Езуса — верагодна, зламыснікі спрабавалі адрэзаць малюнак.

Калі гэта адбылося, дакладна невядома. Па здымках турыстаў відаць, што як мінімум у сярэдзіне лютага пашкоджанні ўжо былі. Але стала вядома пра акт вандалізму толькі цяпер. Праваахоўныя органы нічога не паведамлялі ні пра інцыдэнт, ні пра тое, ці праводзіцца яго расследаванне.

Гэты банер разам з іншымі абразамі размясціў яшчэ ранейшы пробашч парафіі ксёндз Уладзіслаў Завальнюк на канструкцыі, якую вянчае фігура святога Яна Паўла II.

Выява Езуса Міласэрнага з'яўляецца копіяй эскіза сусветна вядомай іконы. Мяркуецца, што гэты эскіз захоўваецца ў касцёле Святога Яна Хрысціцеля ў Ваўкалаце Віцебскай вобласці і быў напісаны мастаком Яўгенам Казіміроўскім у Вільні для благаслаўлёнага айца Міхаіла Сапоцькі і святой Фаустыны Кавальскай.

Наш канал в Telegram – только интересное и важное. Подписаться >