Цікавыя назіранні: ці карыстаюцца беларускія вернікі VPN і роднай мовай?

Праглядаючы статыстыку сайта, звярнулі ўвагу на некаторыя паказчыкі, якія гавораць пра пэўныя тэндэнцыі. Дзелімся лічбамі і высновамі.

Статыстыка за мінулы тыдзень паказвае, што за 7 дзён сайт наведалі звыш 5 тысяч чалавек, і з іх большасць – быццам бы з Нарвегіі. Насамрэч, так адлюстроўваюцца клікі з выкарыстаннем VPN.

Нагадаем, год таму наш сайт заблакавалі ў Беларусі, аднак адзін з аператараў сувязі пакінуў доступ да сайту з тэрыторыі краіны, таму наведаванні з беларускіх IP здараюцца. За тыдзень такіх было каля 450.

Асноўная частка з іх прыйшла на сайт з Google праз запыты пра Будслаўскі фэст – клікаў па гэтых запытах было больш за 1000. І вось што тут цікавага.

Абсалютна ўсе пошукавыя запыты пра Будслаў (звыш 10 варыянтаў) былі на рускай мове. І ўвогуле, практычна ўсе запыты, па якіх наведвальнікі прыходзяць на сайт, людзі фармулююць па-руску.

За апошні час сустракаўся толькі адзін беларускамоўны запыт, па якім вернік трапіў на сайт – «чытанні дня».

Аднак нельга выключаць, што запытаў па-беларуску было больш, толькі Google кепска індэксуе старонкі з беларускай мовай, таму можа не выдаваць вынікі.

Што тычыцца пераходаў па запытах аб Будслаўскім фэсце, то статыстыка паказвае, што VPN пры пошуках быў уключаны ў невялікай часткі вернікаў. Напрыклад, па самым папулярным запыце спасылка на старонку была паказана за тыдзень звыш 3 тысяч разоў і была размешчана пры выдачы ў першых радках. Але толькі крыху больш за 10% змаглі перайсці па спасылцы.

Наш канал в Telegram – только интересное и важное. Подписаться >