Надзея пакуль не спраўдзілася: ксяндза Акалатовіча вярнулі ў калонію

Былы пробашч каталіцкай парафіі ў Валожыне ксёндз Генрых Акалатовіч, асуджаны на 11 гадоў зняволення па абвінавачванні ў «здрадзе дзяржаве», зноў накіраваны ў калонію ў Бабруйску, даведаліся вернікі.

Раней стала вядома, што святара, які ўжо знаходзіўся ў калоніі, нечакана вярнулі ў СІЗА Мінска. У вернікаў тады з'явілася надзея, што яго рыхтуюць да вызвалення перад прыездам у Беларусь новага Апостальскага нунцыя, дыпламатычнага прадстаўніка Ватыкана.

Але аказалася, што святара пераводзілі ў СІЗА для разгляду яго скаргі на прысуд, з якім ён не згодны, не прызнаючы сябе ў чым-небудзь вінаватым. Ці быў у выніку зменены прысуд?

Наколькі вядома вернікам, не – прысуд застаўся ранейшым. Верагодна, скаргу разглядаў старшыня Вярхоўнага суда Беларусі, паколькі абскарджанне рашэння Мінскага абласнога суда ў Вярхоўным судзе ўжо адбывалася. Але падрабязнасці вернікам не вядомыя.

Пісаць лісты ксяндзу Генрыху можна па ранейшым адрасе.

Такім чынам, прыезд новага Апостальскага нунцыя пакуль ніяк не паўплываў на сітуацыю, аднак пакуль і не было ўручэння Даверчых грамат, нічога не паведамлялася і аб якіх-небудзь сустрэчах прадстаўніка Святога Пасаду з уладамі.

Наш канал в Telegram – только интересное и важное. Подписаться >