На выратаванне вядомага касцёла дзяржава так і не знайшла грошай і звярнулася да грамадзян

Магілёўскі райвыканкам 18 лістапада абвясціў аб зборы ахвяраванняў для правядзення супрацьаварыйных мерапрыемстваў і кансервацыйных работ закінутага касцёла святога Мікалая ў вёсцы Княжыцы – папулярнае месца для фотасесій.

Публікацыю назвалі «зваротам да спадкаемцаў гісторыка-культурных каштоўнасцяў Магілёўшчыны» і адзначылі, што будынак храма мае патрэбу ў правядзенні тэрміновых супрацьаварыйных і кансервацыйных работ. Для гэтага адкрылі дабрачынны рахунак і звярнуліся «да ўсіх неабыякавых з просьбай аказаць фінансавую дапамогу».

Будынак XVII стагоддзя ўваходзіць у спіс ахоўных дзяржавай помнікаў архітэктуры і належыць дзяржаве, таму яна павінна пра яго клапаціцца. Але цягам некалькіх гадоў грошай у бюджэце нават на кансервацыю будынка так і не знайшлі.

Яшчэ ў 2015 годзе касцёл у Княжыцах, які ўваходзіць у спіс гісторыка-культурнай спадчыны краіны, уключылі ў рэгіянальны комплекс мерапрыемстваў па рэалізацыі ў Магілёўскім раёне дзяржпраграмы «Культура Беларусі» на 2016-2020 гады. На аднаўленчыя работы абяцалі выдзеліць каля 370 тысяч рублёў. Але сродкаў ні ў раённым, ні ў абласным бюджэтах не знайшлося.

Па законе, захаванасць гісторыка-культурнай каштоўнасці абавязаны забяспечыць уласнік. Будынак стаіць на балансе Княжыцкага сельвыканкама, але ўсё, што там змаглі зрабіць – аперазалі небяспечны аб'ект драўляным плотам, закалацілі ўсе ўваходы, па перыметры развесілі шыльды: «Уваход забаронены».

У 2024 годзе мясцовыя жыхары накіроўвалі петыцыю з просьбай аднавіць гэты аб'ект гісторыка-культурнай спадчыны. Але сродкаў так і не выдзелілі нават на мінімальныя працы.

Цяпер грошы спрабуюць сабраць праз дабрачынны рахунак. Пералічыць ахвяраванні можна па гэтых рэквізітах:

№ BY67AKBB36410573113537000000 в ОАО АСБ «Беларусбанк»

МОУ №700, BICAKBBBY2Х, УНП 700020223

с пометкой «Костел св. Николая» в аг. Княжицы Могилевского района