Царква Францыі аб тэрактах: Зло не павінна панаваць

Зло не павінна трыумфаваць. З такімі словамі французскі епіскапат звяртаецца ў гэтыя дні да вернікаў. «Першая рэакцыя французскіх біскупаў, зразумела, шок. Затым перадусім гэта спачуванні членам сем’яў загінулых», — паведаміў Олівер Думас, генеральны сакратар і прэс-сакратар Канферэнцыі Каталіцкіх Біскупаў Францыі.

«Усе свае малітвы мы прысвяцім Богу ў гэтай інтэнцыі, Які з’яўляецца мірам і надзеяй, з упэўненасцю ў тым, што зло не можа і не будзе трыумфаваць. Мы павінны падтрымліваць адно аднаго ў гэтай сітуацыі, каб перамагчы гэту тэратыстычную небяспеку. Не толькі Парыж быў мэтай гэтых атак, аднак усё грамадства, адмысловы спосаб жыцця быў сёння атакаваны».

У пісьмовым тлумачэнні арцыбіскуп французскай сталіцы, кардынал Андрэ Арман Вен-Труа прыгадаў атакі тэрарыстаў з пачатку года ў Парыжы, а таксама ў Бейруце і Нігерыі і іншых частках свету. «Супраць гвалту патрэбна сэрца, якое не перапоўнена нянавіcцю, — сказаў кардынал, "мы просім аб міласці быць тымі, хто сумесна будуе мір. Мы ніколі не можам дазволіць сумнявацца сабе ў міры, які будуецца на справядлівасці».

Олівер Думас адзначыў: «У мінулую ноч усе мы бачылі: многія з тых, хто больш не мог сядзець дома, адкрылі свае дзверы. Інакш кажучы: зрабілі лепшае з таго, што маглі, каб хоць нешта супрацьпаставіць таму горшаму. Роля хрысціян павінна заключацца ў тым, каб уносіць дабро і клапаціцца пра тое, каб гэтае дабро пашыралася і ўсё больш рабілася бачным. Патрэбна малітва, гэта для нас як удых паветра для нашага існавання; а таксама спачуванне. Мы стаім на баку тых, хто зараз пакутуе. І ўсе мы павінны захоўваць супакой. Мы павінны і далей быць разам і сумесна змагацца, каб станавіцца мацней: "Разам мы мацнейшыя"».

Рэакцыя рэлігій у Францыі

Рэлігійныя кіраўнікі асудзілі злачынныя атакі ў Парыжы з больш чым 120 загінулымі і заклікалі да малітвы за ахвяр. Усе католікі Парыжа запрошаныя на святую Імшу вечарам у суботу ў катэдру Нотр Дам, званы якой будуць біць у памяць пра загінулых і іх сем’і. Французская рада ісламу рашуча асудзіла «поўныя нянавісці і пагарды атакі». Улічваючы асаблівую цяжкасць гэтых дзеянняў, асабліва важнай з’яўляецца ў гэты час еднасць і салідарнасць. Рада ісламу заклікала мусульман у Францыі да малітвы «у міры і годнасці».

Познім вечарам 13 лістапада ў Парыжы адбылася серыя тэрактаў, у выніку якіх загінула больш за 120 чалавек.

Сatholic.by