У Браславе ўшанавалі Маці Божую Валадарку азёраў

20 жніўня святой Імшой на палявым алтары завяршыліся ўрачыстасці ў гонар Маці Божай Валадаркі азёраў у браслаўскім санктуарыі, якія сёлета праходзілі пад дэвізам «З неспасцігальнай міласэрнасці Бога Я для вас - Маці». Узначаліў Эўхарыстыю біскуп Гродзенскі Аляксандр Кашкевіч, канцэлебравалі біскуп Віцебскі Алег Буткевіч, дапаможныя біскупы Мінска-Магілёўскай архідыяцэзіі Аляксандр Яшэўскі SDB і Юрый Касабуцкі, дапаможны біскуп Гродзенскай дыяцэзіі Юзаф Станеўскі, а таксама шматлікія святары. На літургію прыбылі і прадстаўнікі мясцовых уладаў.

Гамілію прамовіў біскуп Аляксандр Кашкевіч. «Гэтае месца дарагое кожнаму з нас, дарагое вернаму люду Браслаўшчыны і аддаленых ваколіц, дарагое таксама тым, якія па волі лёсу апынуліся ў далёкім свеце, але ў чыіх сэрцах засталася любоў і прывязанасць да сваіх родных старонак», - сказаў гродзенскі ардынарый. - У гэтым асаблівым месцы, асвечаным верай і малітвай, цярпеннем і ахвярай нашых продкаў, мы ўшаноўваем Марыю як Валадарку азёраў».

Перад заключнай Імшой адбылася прэзентацыя перакладзенай на беларускую мову кнігі «Імя Бога - Міласэрнасць» - размовы Папы Францішка з ватыканістам Андрэа Тарніелі, у якой Пантыфік праз успаміны з маладосці і кранальныя эпізоды са свайго пастырскага досведу тлумачыць прычыны абвяшчэння Надзвычайнага Святога Года Міласэрнасці.

Сatholic.by