30 юнакоў удзельнічаюць у сустрэчы міністрантаў у Пінску [фота]

Чарговая сустрэча міністрантаў распачалася 3-ага студзеня ў Пінскай духоўнай семінарыі. Маладыя людзі сабраліся, каб на працягу амаль трох дзён разважаць над сваім пакліканнем, развіваць і паглыбляць свае веды аб літургіі і служэнні пры алтары. Праводзіць сустрэчу ксёндз Павел Рудзьман, адказны за працу з моладдзю і пакліканні ў Пінскай дыяцэзіі.

На працягу дня хлопцы маюць магчымасць удзелу ў канферэнцыях, крэатыўнай працы ў групах, малітве, вясёлых конкурсах і гульнях, а таксама могуць проста пазнаёміцца і праводзіць час разам. Такія сустрэчы праходзяць ў семінарыі рэгулярна, звычайна ў час школьных канікулаў, калі ў міністрантаў больш вольнага часу. У гэтай сустрэчы, якая працягнецца да 5-ага студзеня, прымаюць удзел 30 юнакоў з розных парафій Пінскай дыяцэзіі.