У Мінску каталіцкі святар выйграў суд у ДАІ

10 лютага суд Фрунзенскага раёна Мінска закрыў адміністрацыйную справу за парушэнне Правілаў дарожнага руху ў дачыненні да пробашча віцебскага каталіцкай парафіі святога Антонія. Кс. Вячаслаў Барок абскардзіў пратакол ДАІ за нібыта парушэнне ПДР на галоўным каталіцкім свяце ў Будславе 1 ліпеня 2016 года. Больш за паўгода святар змагаўся за адмену несправядлівага пакарання - тады ён быў аштрафаваны на 42 рублі.

Святару інкрымінавалася незаконная паркоўка на перакрыжаванні. Традыцыйна ў дзень свята рух у Будславе перакрываецца, праехаць на спецыяльна адведзеную стаянку ля Нацыянальнага санктуарыя могуць толькі святары і прадстаўнікі ўладаў, але канфлікт разгарэўся пасля таго, як супрацоўнікі ДАІ не прапусцілі святара да гэтай стаянкі.

У кастрычніку ксёндз аспрэчыў штраф ДАІ, тады суд адправіў пратакол на дапрацоўку. Аднак у Дзяржаўтаінспекцыі зноў прызналі святара вінаватым. У другі раз суд спыніў адміністрацыйны працэс і зняў віну з пробашча касцёла.

- Пра гэта паведамілі майму адвакату, рашэння з матывіроўкай мы пакуль не бачылі. Міліцыянты заблыталіся і давалі супярэчлівыя паказанні, - адзначыў святар.

Кс. Вячаслаў прызнаўся, што рады перамозе, аднак шкадуе, што дамагацца правасуддзя давялося так доўга, траціць грошы на сваю абарону і дарогу з Віцебска ў Мінск.