Першую камунію ў Светлагорску прынялі чатыры дзяўчынкі [фота]

28 траўня ў касцёле Светлагорска адзначылі свята Першай Камуніі, якую прымалі чатыры дзяўчынкі, і заканчэнне чарговага катэхетычнага года. Гэта свята зграмадзіла шмат людзей у касцёле, асабліва бацькоў і дзяцей, і іх гасцей, якія перажывалі вялікую радасць з прыняцця першы раз у сваім жыцці Езуса пад відам хлеба. А таксама гэта была падзяка Богу за чарговы год пазнавання Яго любові на занятках катэхезы і час даручыць Божаму Провіду перыяд адпачынку. Але гэта не азначае, што надыходзіць час адпачынку ад Бога, бо Ён яго не мае. Гэта час прыбліжэння да Яго ў іншым спосабе. Бог, найлепшы Тата, заўсёды чакае сваіх дзяцей, дзе б яны не знаходзіліся. Пробашч запрашаў памятаць аб нядзельным спатканні з Езусам на Святой Імшы і штодзённай малітве.

Пасля свята дзяцей і іх бацькоў чакаў салодкі сюрпрыз, каб яны пасмакавалі як добра і салодка прыбываць з Богам, і каб кожны мог адчуць сябе Божым Дзіцём, бо 1 чэрвеня - Дзень дзіцяці.