«Постсавецкія католікі». Дазвол адмяніць пост 8 сакавіка выклікаў рэзананс

Рашэнне аб вызваленні ад абавязку ўстрымання ад спажывання мясных страў 8 сакавіка прыняў Мітрапаліт Мінска-Магілёўскі арцыбіскуп Юзаф Станеўскі. Нагадаем, цяпер католікі перажываюць Вялікі пост, і свята жанчын, да якога многія ставяцца скептычна, прыходзіцца на пятніцу – дзень засяроджання на ўкрыжаванні і смерці Езуса Хрыста.

«У пятніцу 8 сакавіка, на якую прыпадае Міжнародны жаночы дзень», у Мінска-Магілёўскай архідыяцэзіі ўдзяляецца дыспенсацыя ад устрымання ад спажывання мясных страваў вернікам, старэйшым за 14 гадоў – вернікі, якія будуць карыстацца гэтай дыспенсацыяй, павінны памаліцца ў інтэнцыях Святога Айца, гаворыцца ў афіцыйным паведамленні.

Што тычыцца іншых дыяцэзій, то пра аналагічныя дазволы біскупаў пакуль не паведамлялася.

Такое рашэнне Мітрапаліта выклікала неадназначную рэакцыю беларускіх католікаў. Многія выказалі ў сацыяльных сетках сваё неразуменне гэтага рашэння, напісалі, што не будуць карыстацца дыспенсацыяй, якая звычайна ўдзяляецца з нагоды касцёльных, а не свецкіх святаў.

У той жа час многія пакінулі пазітыўныя рэакцыі пад паведамленнем аб дыспенсацыі, а навіну пракаментаваў нават расійскі праваслаўны блогер і грамадскі дзеяч, філосаф Андрэй Кураеў:

«Беларускія постсавецкія католікі змогуць без мукаў сумлення быць з усімі за святочным сталом».

Раней, калі 8 сакавіка прыходзілася на пятніцу Вялікага посту, у некаторых парафіях, напрыклад, гомельскай, праводзілі Крыжовы шлях у інтэнцыі жанчын (на фота).

Наш канал в Telegram – только интересное и важное. Подписаться >