«Відавочна, колькасць скароціцца». У Беларусі пачынаецца перарэгістрацыя парафій

Паводле прынятага ў 2024 годзе закона, у Беларусі з 1 ліпеня пачынаецца перарэгістрацыя рэлігійных арганізацый, якімі таксама з'яўляюцца праваслаўныя і каталіцкія парафіі, пратэстанцкія супольнасці. Ці стане працэдура праблемай для каталіцкіх вернікаў, Katolik.life спытаў у святароў.

Яны не чакаюць, што сама працэдура будзе вялікай цяжкасцю. Аднак, відавочна, колькасць парафій істотна скароціцца – асабліва ва ўсходняй частцы Беларусі, дзе пасля аднаўлення структур Касцёла ў 1990-х гадах масава рэгістравалі парафіі ў месцах, дзе яны існавалі ў дакамуністычныя часы.

Акрамя аднаўлення гістарычных парафій рэгістравалі і новыя, але ў многіх з іх на працягу мінулых 30 гадоў неабходнай колькасці вернікаў не набралася. Таму, фактычна, у некаторых парафіях ніякай дзейнасці не вялося, яны існавалі толькі на паперы.

На ліквідацыю такіх супольнасцяў ужо падалі заявы. Напрыклад, гэта адна з парафій на усходзе Беларусі, якая з'явілася яшчэ пры Вялікім Княстве Літоўскім, а нанава была рэарганізавана ў 1990-х. Тут захаваліся руіны касцёла, які, аднак, аднавіць немагчыма.

У парафіі фактычна няма вернікаў. Таму ліквідацыя падобных парафій – гэта таксама вырашэнне праблемы з боку Касцёла, якому часам «уцюхвалі» аварыйныя будынкі святынь, аднаўленне якіх патрабуе велізарных сродкаў.

Сярод парафій, якія будуць ліквідаваныя, ёсць некаторыя больш-менш «жывыя», аднак неабходнай колькасці вернікаў там таксама няма: паводле новых правілаў, заснавальнікамі супольнасці павінны быць мінімум 20 чалавек. Пры гэтым, неабходна пазначаць месца працы вернікаў, уводзяцца і некаторыя іншыя абмежаванні.

Але, па сутнасці, новая працэдура паказвае рэальны стан рэчаў у Касцёле. Як падкрэсліваюць святары, ліквідацыя не азначае, што ў гэтых месцах не будзе душпастырскай апекі вернікаў.

А якія цяжкасці могуць узнікнуць пры перарэгістрацыі «жывых» парафій, меркаваць пакуль рана.

Наш канал в Telegram – только интересное и важное. Подписаться >