З уваходу ў Чырвоны касцёл знікла апячатванне. Нешта адбываецца?

Па свежых здымках турыстаў у сацсетках мы заўважылі, што з дзвярэй закрытага амаль два гады Чырвонага касцёла ў Мінску знік дакумент аб тым, што будынак храма апячатаны. Калі на фота ад 11 жніўня ўваход у касцёл яшчэ быў апячатаны, то на здымках ад 12 жніўня — ужо не.

Гэта адбылося праз два тыдні пасля змены пробашча парафіі Святога Сымона і Святой Алены, якая размяшчалася ў Чырвоным касцёле. Таму зняцце апячатванне магло быць успрынята як пачатак доўгачаканых прац у храме, якія анансавалі ўлады і пасля завяршэння якіх абяцалі зноў адкрыць касцёл. Вернікі лічаць, што адной з умоў гэтага была змена пробашча.

Аднак пакуль усё застаецца без зменаў. Як распавялі парафіяне, ніякай дзейнасці ў храме не назіраецца, а ўсе астатнія дзверы касцёла застаюцца апячатанымі. Парафіяне мяркуюць, што пячатку з галоўнага ўваходу хтосьці сарваў па невядомых матывах, як гэта ўжо было ў студзені.

Ніякай афіцыйнай інфармацыі пра пачатак работ у храме па-ранейшаму няма.

Наш канал в Telegram – только интересное и важное. Подписаться >