Вядомы беларускі святар у Маскве, «скрыпач Бога», трапіў у рэанімацыю

Каталіцкія вернікі ў Расіі паведамілі, што 1 лістапада, ва ўрачыстасць Усіх святых, святар-манах Пётр Карнялюк трапіў у лякарню. Ён знаходзіцца ў рэанімацыі ў цяжкім стане, ляжыць пад апаратам штучнай вентыляцыі лёгкіх, ёсць пагроза жыццю.

Айцец Пётр – францішканін, родам з Беларусі, ужо шмат гадоў служыць у Маскве, дзе яго любяць і паважаюць. Святар вядомы сваімі музычнымі талентамі, за што яго называюць «скрыпачом Бога». Для беларускай супольнасці ў Маскве айцец Пётр перыядычна адпраўляе святыя Імшы па-беларуску.

Паводле інфармацыі вернікаў, раніцай 1 лістапада айцец Пётр раптам адчуў сябе кепска. Як паведамілі раніцай 2 лістапада францішкане ў Расіі, святар знаходзіцца ў інфекцыйнай лякарні ў Маскве – па апошняй інфармацыі, у яго менінгіт. Вернікаў просяць аб малітве.

Айцец Пётр скончыў музычнае вучылішча ў Брэсце, універсітэт культуры ў Мінску, а затым – каталіцкую духоўную семінарыю ў Санкт-Пецярбургу.

Таксама 1 лістапада стала вядома пра смерць іншага каталіцкага святара – у гэты дзень адышоў у вечнасць 50-гадовы пробашч парафіі ў Астраўцы ксёндз Андрэй Горбач.