Маленькая парафія шукае салідарнасці, каб уратаваць сваю святыню

10-15 вернікаў на Імшы ў нядзелю і касцёльны комплекс, які неабходна вывесці з аварыйнага стану – такая рэчаіснасць каталіцкай парафіі ў райцэнтры Чавусы, мястэчку на ўсходзе Беларусі, на Магілёўшчыне.

Сума на самае неабходнае – замену вокнаў, рамонт гідраізаляцыі, ганку і столі – не такая вялікая, але непад'ёмная для маленькай парафіі. Таму пробашч, ксёндз Андрэй Кеўліч, які з-за недахопу святароў таксама служыць у яшчэ дзвюх парафіях, адкрыў у Instagram старонку для збору ахвяраванняў.

У серыі відэа святар адкрыта і душэўна распавядае пра сітуацыю і адказвае на пытанні, а парафіяне – дзякуюць усім ахвярадаўцам і абяцаюць малітву за іх. Рэквізіты для дапамогі – таксама на старонцы святара.

Супольнасць у Чавусах мае багатую і трагічную гісторыю. Першы касцёл і кляштар айцоў кармелітаў былі пабудаваныя тут пасля 1612 году, аднак у выніку вынішчальнай маскоўскай вайны 1654-1667, чавуская рыма-каталіцкая парафія налічвала ўсяго 150 вернікаў і не мела ўласнага пастыра.

У 1905 годзе жыхары Чавусаў пабудавалі новы касцёл. У гады камуністычных рэпрэсій двое святароў былі арыштаваныя. Апошні перад вайной чавускі пробашч, ксёндз Юзаф Лук'янін, арыштаваны ў 1929 годзе і растраляны ў савецкіх лагерах.

17 снежня 1994 году першы раз пасля пераследу ў Чавусах, у прыватным доме, цэлебравалі святую Імшу. У 2002 годзе асвяцілі пабудаваную парафіяльную святыню.

Наш канал в Telegram – только интересное и важное. Подписаться >